काठमाडौं । दक्षिण अमेरिकी देश बोलिभियाको सैन्य ब्यारेकमा आतिशबाजीमा प्रयोग हुने पाइरोटेक्निक सामग्री विस्फोट हुँदा कम्तीमा दुई जनाको मृत्यु भएको छ भने दर्जनौँ घाइते भएका छन्।

रोयटर्सका अनुसार राजधानी ला पाजबाट करिब ३० किलोमिटर टाढा भियाचा नगरपालिकास्थित सैन्य ब्यारेकमा शुक्रबार दिउँसो करिब २ः३० बजे विस्फोट भएको हो। उक्त ब्यारेकमा तोपखाना रेजिमेन्ट तैनाथ छ।

बोलिभियाका रक्षामन्त्री अर्नेस्टो जस्टिनियानोले घटनामा दुई जनाको मृत्यु र दर्जनौँ घाइते भएको बताएका छन्। रक्षा मन्त्रालयले भने १४ जना अझै बेपत्ता रहेको जनाएको छ।

स्थानीय स्वास्थ्य अधिकारीका अनुसार घाइतेको संख्या ६२ पुगेको छ। घाइतेमध्ये १४ जनालाई उपचारका लागि ला पाजका अस्पतालमा लगिएको छ। प्रहरीले भने ५० भन्दा बढी व्यक्ति घाइते भएको जनाएको छ।

विस्फोटका कारण आसपासका दर्जनौँ घरमा क्षति पुगेको छ भने अधिकांश घरका झ्याल फुटेका छन्। स्थानीय स्वास्थ्य निर्देशक रीता नेब्रास्काले घटनापछि अर्को विस्फोटको जोखिम रहेको भन्दै सैन्य अड्डाबाट कम्तीमा १५० मिटर टाढा रहन सर्वसाधारणलाई आग्रह गरेकी छन्।

प्रहरी प्रवक्ता रोजर रोकाका अनुसार ब्यारेकमा आतिशबाजीका सामग्री भण्डारण गरिएको थियो। विस्फोटको कारणबारे अनुसन्धान भइरहेको छ।

यसैबीच भियाचाका अधिकारीहरूले घटनापछि तीन दिनको शोक घोषणा गरेका छन्।

Originally published on abcnews.com.np.