संखुवासभा । संखुवासभाको मकालु गाउँपालिका–१ चिर्खाङमा विद्यालयमै बस्दै आएका एक शिक्षकको गोली हानी हत्या भएको छ।

बिहीबार कालिका आधारभूत विद्यालयमा कार्यरत ३६ वर्षीय नर कुबिर खम्बु राईको गोली प्रहारबाट मृत्यु भएको हो। सिलिचोङ गाउँपालिका–५ याफु घर भएका राई विद्यालयमै बसेर अध्यापन गर्दै आएका थिए।

प्रहरीका अनुसार खाना खाइसकेपछि भाँडा धुन विद्यालयबाहिर निस्किएका बेला राईमाथि गोली प्रहार भएको थियो। अचानक बन्दुक पड्किएको आवाज आएपछि सोही विद्यालयमा बस्दै आएकी शिक्षिका टिकामाया राई बाहिर निस्केर हेर्दा नर राई ढलेको र शरीरबाट रगत बगिरहेको अवस्थामा भेटिएको प्रहरीले जनाएको छ।

घटनापछि प्रहरीले अनुसन्धान अघि बढाएको छ। घटनामा संलग्न भएको आशंकामा मकालु गाउँपालिका–१ सिउँडीबारीका ३३ वर्षीय पत्न कुलुङ राईलाई घटनामा प्रयोग भएको भरुवा बन्दुकसहित पक्राउ गरिएको प्रहरीले जनाएको छ।

पक्राउ परेका राईमाथि थप अनुसन्धान भइरहेको प्रहरीले जनाएको छ। घटनाको कारण भने प्रहरीले खुलाएको छैन।

Originally published on abcnews.com.np.