काठमाडौं । सर्वोच्च अदालतको नयाँ भवनको भुइँतलामा बुधबार राति आगलागी भएको छ। आगलागीबाट केही कागजपत्र जले पनि ठूलो क्षति नभएको सर्वोच्च अदालतले जनाएको छ। सर्वोच्च अदालतका प्रवक्ता अर्जुन कोइरालाका अनुसार मध्यराति करिब १ बजेतिर ‘अन्डरग्राउन्ड’मा आगलागी भएको हो। घटनाको कारण खुल्न सकेको छैन। ‘चुरोट खाएर फालेको हो कि, विद्युत् सर्ट भएर हो वा अन्य कुनै कारणले आगलागी भएको हो भन्ने विषयमा प्रशासनिक र प्रहरी दुवै तहबाट छानबिन भइरहेको छ,’ प्रवक्ता कोइरालाले बताए। उनका अनुसार अभिलेखमा डम्प गरी राखिएका केही मिसिल जलेका छन्। आगलागीबाट ठूलो क्षति भने नभएको उनले जानकारी दिए। घटना नियतवश भएको हो कि होइन भन्ने विषयमा पनि प्रहरीले अनुसन्धान गरिरहेको छ। आगलागी भएको स्थाननजिकै पावर सर्किटसमेत जलेको देखिएकाले त्यसैबाट आगलागी भएको हो वा अन्य कारणले भन्नेबारे अनुसन्धान भइरहेको सर्वोच्च प्रशासनले जनाएको छ।

Originally published on abcnews.com.np.