काठमाडौं । भुटानमा जारी सेन्ट्रल एसिया भलिबल संघ (काभा) बिच भलिबल टुरमा नेपाली महिला खेलाडी भावना डाँगी र सुनिता राईको जोडी फाइनलमा प्रवेश गरेको छ।

आइतबार भएको सेमिफाइनलमा भावना र सुनिताको जोडीले भारतका रेवती र श्वेताको जोडीलाई २१–१५, २४–२२ को सोझो सेटमा पराजित गर्दै उपाधि भिडन्त पक्का गरेको हो।

अब स्वर्ण पदकका लागि नेपाली जोडीले भारतकै पवित्रा र दीपिकाको जोडीसँग प्रतिस्पर्धा गर्नेछ।

पवित्रा र दीपिकाले अर्को सेमिफाइनलमा नेपालकै कमला पुन र कोपिला रानाको जोडीलाई २१–१६, २१–२४ ले हराउँदै फाइनलमा स्थान बनाएको हो।

उपाधि भिडन्तमा नेपाली जोडीले भारतलाई हराउँदै स्वर्ण जित्ने लक्ष्यसहित कोर्टमा उत्रिनेछ।

यसैगरी, कांस्य पदकका लागि कमला पुन–कोपिला रानाको जोडी र भारतका रेवती–श्वेताको जोडीबीच प्रतिस्पर्धा हुनेछ।

Originally published on abcnews.com.np.