किएभ । युक्रेन युद्ध अन्त्य गर्ने प्रयासस्वरूप अमेरिकी राष्ट्रपति डोनाल्ड ट्रम्पका विशेष दूत स्टिभ विटकफ र जारेड कुशनरले रुसी राष्ट्रपति भ्लादिमिर पुटिनसँग ‘ठोस योजना’बारे छलफल गर्नुभएको छ।

मस्कोमा शनिबार तीन घण्टाभन्दा लामो समय भएको वार्तालाई क्रेमलिनका वरिष्ठ अधिकारी युरी उशाकोभले स्पष्ट र रचनात्मक बताउनुभएको छ। उहाँका अनुसार अमेरिकी पक्षले युद्ध अन्त्य गर्ने सम्भावित उपायबारे विभिन्न प्रस्ताव अघि सारेको थियो। तर, वार्ताबाट तत्काल कुनै ठोस सहमति वा सफलता भने घोषणा गरिएको छैन।

पुटिनसँगको भेटपछि विटकफ र कुशनर आइतबार युक्रेनको राजधानी किएभ पुग्नुभएको छ। उहाँहरूले राष्ट्रपति भोलोदिमिर जेलेन्स्कीसँग युद्ध अन्त्यका सम्भावित उपायबारे छलफल गर्ने अपेक्षा गरिएको छ। युद्ध सुरु भएयता विटकफ र कुशनरको यो पहिलो किएभ भ्रमण हो।

क्रेमलिनका अनुसार वार्ताका क्रममा पुटिनले रुसको सैन्य अवस्थाबारे आफ्नो धारणा राख्दै पूर्वी युक्रेनमा बाँकी भूभाग कब्जा गर्ने लक्ष्यबाट पछि नहट्ने सङ्केत दिनुभएको छ।

यता, युक्रेनले आफ्नो भूभाग त्याग्ने कुनै पनि सम्झौता स्वीकार नगर्ने अडान दोहोर्याउँदै आएको छ। रुसले पनि आफ्नो सैन्य लक्ष्य पूरा गर्ने अडान कायम राखेको छ।

अमेरिकी दूतहरूको शान्ति वार्तालाई सहज बनाउन रुस र युक्रेनले आफ्ना राजधानीमा तीन दिनसम्म आक्रमण नगर्ने प्रतिबद्धता जनाएका छन्। तर, सीमित आक्रमणविरामकै बीच युक्रेनका विभिन्न क्षेत्रमा रुसी आक्रमण जारी रहेको युक्रेनी पक्षले जनाएको छ।

रुस र युक्रेनबीच मुख्य मतभेद कायमै रहेकाले तत्काल युद्धविराम वा शान्ति सम्झौता हुने अवस्था भने अझै स्पष्ट छैन। यद्यपि, अमेरिकी दूतहरूको किएभ भ्रमणलाई वासिङ्टनको शान्ति प्रयासलाई पुनः गति दिने महत्वपूर्ण कदमका रूपमा हेरिएको छ।

Originally published on abcnews.com.np.