काठमाडौं । नेपालले एसीसी प्रिमियर कपमा लगातार तेस्रो जित निकाल्दै एक खेलअगावै सेमिफाइनलमा स्थान पक्का गरेको छ।

आइतबार मलेसियाको बायोमास ओभलमा भएको खेलमा नेपालले साउदी अरेबियालाई ५ विकेटले पराजित गरेको हो।

साउदीले दिएको १९१ रनको लक्ष्य नेपालले ४१ ओभरमा ५ विकेट गुमाएर पूरा गर्‍यो।

नेपालको जितमा गुल्सनकुमार झाले अविजित ४४ रन बनाए। इशान पाण्डेले ४०, देव खनालले ३९, कप्तान रोहितकुमार पौडेलले अविजित २४, आसिफ शेखले २० तथा अर्जुन कुमालले १५ रनको योगदान दिए।

तेस्रो विकेटका लागि इशान र देवबीच ७३ रनको साझेदारी भएको थियो। यस्तै, छैटौँ विकेटका लागि गुल्सन र रोहितले अविजित ६१ रनको साझेदारीगर्दै नेपाललाई सहज जित दिलाए।

साउदीका इश्तियाक अहमद र मोहम्मद अतिफले दुई–दुई तथा मोहम्मद हिशाम शेखले एक विकेट लिए।

त्यसअघि टस जितेर पहिले ब्याटिङ गरेको साउदीले ४९.२ ओभरमा सबै विकेट गुमाउँदै १९० रन बनाएको थियो।

साउदीका अब्दुल वाहिदले सर्वाधिक ७७ रन बनाए। उनले ८९ बलमा १० चौका र दुई छक्का प्रहार गरे। मोहम्मद अतिफले ३०, मोहम्मद हिशाम शेखले २८, मोहम्मद सकिबले १४, जैनुल अबिदिनले १२ तथा इश्तियाक अहमदले अविजित १० रन बनाए।

दोस्रो विकेटका लागि वाहिद र अतिफबीच ९४ रनको साझेदारी भएको थियो।

नेपालका कप्तान सन्दीप लामिछाने र दीपेन्द्रसिंह ऐरीले समान तीन–तीन विकेट लिए। ललितनारायण राजवंशीले दुई तथा शेर मल्ल र गुल्सनकुमार झाले एक–एक विकेट हात पारे।

लगातार तीन जितपछि तीन खेलबाट ६ अंक जोडेको नेपाल समूह ‘ए’को शीर्ष स्थानमा छ। नेपालले यसअघि बहराइन र मलेसियालाई पराजित गरेको थियो।

यता, तेस्रो हार व्यहोरेको साउदीले चार खेलबाट दुई अंक जोड्दै प्रतियोगिता समाप्त गरेको छ। साउदी हङकङ र मलेसियासँग पराजित भएको थियो भने बहराइनलाई हराएको थियो।

नेपालले समूह चरणको अन्तिम खेलमा मंगलबार हङकङसँग प्रतिस्पर्धा गर्नेछ।

Originally published on abcnews.com.np.