काठमाडौं । इरानको सर्वोच्च राष्ट्रिय सुरक्षा परिषद्का सचिव मोहसेन रेजाईले आगामी केही दिनभित्र होर्मुज जलमार्गबाहिर नयाँ ‘प्रतिबन्धित क्षेत्र’ घोषणा गरिने बताएका छन् । इरानी सरकारी सञ्चारमाध्यमका अनुसार उक्त क्षेत्र फारसको खाडीका अन्य भूभागसम्म विस्तार गरिनेछ ।

रेजाईका अनुसार नयाँ प्रतिबन्धित क्षेत्र अमेरिकी नौसेनाले निर्धारण गरेको नाकाबन्दीको रेखाबाट सुरु भएर पर्सियन खाडीका अन्य क्षेत्रसम्म फैलिनेछ ।

इरानले तोकेको उक्त प्रतिबन्धित क्षेत्रमा प्रवेश गर्ने जुनसुकै विदेशी जहाज वा पोतलाई इरानको आधिकारिक प्रतिबन्ध सूचीमा राखिने चेतावनी पनि दिइएको छ ।

यसैबीच, ओमानसँगको सहकार्यमा इरानले व्यवस्थापन गर्ने नयाँ अन्तर्राष्ट्रिय जलमार्गको खाका तयार पारिएको रेजाईले बताएका छन् । उनका अनुसार होर्मुज जलमार्ग हुँदै हुने जहाजको आवागमनलाई व्यवस्थित गर्न इरान र ओमानबीच तय गरिएको नयाँ जलमार्गको नक्सामा दुवै देशले आगामी केही दिनभित्र औपचारिक रूपमा हस्ताक्षर गर्नेछन् ।

खाडी क्षेत्रमा अमेरिका र इरानबीचको सैन्य मुठभेड तथा तेल ट्यांकरमाथिका आक्रमण तीव्र भइरहेका बेला इरान र ओमानबीच भएको नयाँ जलमार्गसम्बन्धी सहमति भएको हो । इरानले घोषणा गर्न लागेको प्रतिबन्धित क्षेत्रलाई रणनीतिक रूपमा महत्त्वपूर्ण घटनाक्रमका रूपमा हेरिएको छ ।

Originally published on abcnews.com.np.