पोखरा । आठ वर्षदेखि अलपत्र पोखराको फिर्के पुल निर्माणका लागि चालु आर्थिक वर्षमा १ करोड २७ लाख रुपैयाँ बजेट विनियोजन भएको छ ।

पूर्वाधार विकास मन्त्रालयको वार्षिक कार्यक्रमअन्तर्गत बजेट विनियोजन भएपछि पुल निर्माणका लागि नयाँ ठेक्का प्रक्रिया अघि बढाउने तयारी गरिएको सडक डिभिजन कार्यालय पोखराले जनाएको छ ।

सडक डिभिजन पोखराका इन्जिनियर पुजन श्रेष्ठका अनुसार फिर्के पुल अब बहुवर्षीय योजनाअन्तर्गत निर्माण गरिनेछ । पोखरा–बागलुङ राजमार्गअन्तर्गत पोखरा महानगरपालिका–४ र ५ जोड्ने फिर्केमा निर्माणाधीन पुलका लागि अहिले लागत अनुमान तयार गर्ने काम भइरहेको छ ।

विनियोजित रकमबाट प्रारम्भिक काम अघि बढाइने भए पनि पुल निर्माण सम्पन्न गर्न आवश्यक कुल लागतबारे पुनः अध्ययन गरिनेछ । पुरानै डिजाइनमा पुल निर्माण गर्ने वा डिजाइन परिवर्तन गर्ने भन्ने विषयमा पनि सडक विभागसँग छलफल भइरहेको श्रेष्ठले बताए ।

वि.सं. २०७५ असोज ८ गते शान्ति आरोग्य जेभीसँग पुल निर्माणको ठेक्का सम्झौता भएको थियो । १७ करोड १० लाख १० हजार ९०० रुपैयाँको लागत अनुमानमा आह्वान गरिएको ठेक्का १२ करोड ३२ लाख २६ हजार १७६ रुपैयाँमा कम्पनीले पाएको थियो । २०७७ चैत ३० गतेसम्म पुल निर्माण सम्पन्न गर्ने सम्झौता भए पनि ठेकेदारले काम पूरा गर्न सकेन ।

ठेकेदार कम्पनीलाई २०७८ असोज २२ गते पहिलो, २०७९ असोज ६ गते दोस्रो र २०८० असार ३१ गते तेस्रोपटक म्याद थप गरिएको थियो । अन्तिम पटक २०८१ असार २७ गतेसम्म म्याद दिइए पनि काम सम्पन्न नभएपछि सडक डिभिजनले ठेक्का सम्झौता तोडेको थियो ।

ठेक्का तोडिएपछि बाँकी काम सम्पन्न गर्न लाग्ने खर्च, त्रुटि सच्याउने लागत, संरचना संरक्षण तथा पुनर्निर्माणलगायतका खर्च ठेकेदारबाट असुल गर्ने प्रक्रिया पनि अघि बढाइएको सडक डिभिजनले जनाएको छ ।

पुल निर्माण नहुँदा दुर्घटनाको जोखिमसमेत बढेको छ । फराकिलो सडकसँग जोडिएको साँघुरो पुलका कारण सवारीसाधन खस्ने जोखिम रहेको जिल्ला ट्राफिक प्रहरी कार्यालय कास्कीले जनाएको छ । जोखिम न्यूनीकरणका लागि ट्राफिक प्रहरीले पुल क्षेत्रमा माटोको ढिस्को र कोण राखेर अस्थायी उपाय अपनाएको छ ।

सडक डिभिजन पोखराले फिर्केमा ‘स्पेस एक्स्ट्राडोज मोटरेबल ब्रिज’ निर्माण गर्ने योजना बनाएको छ । ठेकेदारको लापरबाहीका कारण लामो समयदेखि अलपत्र यो पुल नयाँ ठेक्कामार्फत अघि बढाउने तयारी गरिएको हो ।

Originally published on abcnews.com.np.