तनहुँ । रसुवाको भोटेकोशी नदीमा आएको विनाशकारी बाढीमा बेपत्ता भएका व्यक्तिको पहिचानका लागि तनहुँ प्रहरीले आफन्तलाई डीएनए नमूना उपलब्ध गराउन आग्रह गरेको छ।

जिल्ला प्रहरी कार्यालय तनहुँका प्रहरी नायब उपरीक्षक द्वारिकाप्रसाद घिमिरेले बेपत्ता व्यक्तिका आफन्तलाई सम्पर्कमा आएर आवश्यक डीएनए नमूना दिन आग्रह गरिएको बताए। उनका अनुसार हालसम्म बेपत्ता व्यक्तिको पहिचानका लागि कसैले पनि डीएनए नमूना उपलब्ध गराएका छैनन्।

बाढीपछि त्रिशूली नदीमा बगाएर ल्याएका शवमध्ये तनहुँको आँबुखैरेनी र देवघाट क्षेत्रबाट हालसम्म ३९ शव फेला परेका छन्। तीमध्ये २४ शव पहिचान तथा व्यवस्थापनका लागि पोखरा पठाइएको छ भने १५ शव व्यास नगरपालिका–५ चनौली क्षेत्रमा व्यवस्थापन गरिएको प्रहरीले जनाएको छ।

यसैबीच, तनहुँ घर भएका ३३ जना बाढीपछि सम्पर्कविहीन भएको विवरण प्राप्त भएकामा हालसम्म नौ जना सम्पर्कमा आएका छन्।

बाँकी २४ जनाको खोजी तथा पहिचानका लागि प्रहरी र सम्बन्धित निकायले काम गरिरहेको छ।

Originally published on abcnews.com.np.