काठमाडौ, १२ वैशाख । लगभग दश हजार जनाको ज्यान लिने गरि ०७२ सालमा गएको विनाशकारी भूकम्पको आज तीन वर्ष पूरा भएको छ । यता प्रधानमन्त्री ओली ;मेरो धरहरा मेरो गौरव; नारा घन्काउदै अघि बढेका छन् । उता पूर्व प्रधानमन्त्री एवंम् नयाँ शक्ति पार्टी नेपालका संयोजक डा. बाबुराम भट्टराईको सोही नारा लक्षित ट्वीटरमा व्यंग्य कसेका छन् ।

उनले सामाजिक संजाल ट्वीटरमा सरकार र प्रधानमन्त्रीले कुनै लज्जाबोध नगरी ‘मेरो धरहरा मेरो गौरव’ भन्दै डम्फु बजाउनु त झन् टाउकाको ओखती नाइटामा लगाएजस्तो भएन र ? भन्दै व्यंग्य गरेका छन् ।

उनले तीन वर्ष बित्दा पनि भत्किएका घर एवं संरचना बन्न नसक्नु राष्ट्रिय लज्जाको विषय भएको बताएका छन् ।

ट्वीटरमा उनले लेखेका छन् ‘ विनाशकारी भूकम्पको तीन बर्षपछि ७ लाख भत्किएका घर र अन्य संरचनामध्ये दुइतिहाइ अझै बन्न नसक्नु राष्ट्रिय लज्जाको विषय हो । तर सरकार र प्रम कुनै लज्जाबोध नगरी मेरो धरहरा मेरो गौरव को डम्फु बजाउन लाग्नु त झन् टाउकाको ओखती नाइटामा लगाए जस्तो भएन र?