काठमाडौं, २१ वैशाख । ऊर्जा, जलस्रोत तथा सिँचाइ मन्त्री वर्षमान पुनले कृषि, उर्जा र जीविकोपार्जनमा परिवर्तन ल्याउने गरी पानीको बृहत र विशेष परियोजनामा ध्यान दिने बताउनुभएको छ ।

‘हाम्रो सरकारले कृषि, उर्जा र जीवीकोपार्जनमा परिवर्तन ल्याउने गरी पानीको बृहत परियोजनामा ध्यान दिनेछ’ मन्त्री पुनले भन्नुभयो, ‘हाम्रो मन्त्रालयले यस्ता परियोजनाको विकाशमा विषेश ध्यान दिनेछ, जसले आर्थिक विकाश र समृद्ध नेपाल बनाउन मद्धत गर्छ ।’

अन्तर्राष्ट्रिय सिँचाइ तथा जल निकास नियोग (आइसिआइडी) को आठौं एसियाली क्षेत्रीय सम्मेलनको समापन कार्यक्रममा बोल्दै मन्त्री पुनले नेपालामा अहिले संक्रमणकालिन अवस्थामा परिवर्तन आएको बताउँदै नयाँँ सरकार आर्थिक बृद्धितर्फ लागेको स्पष्ट गर्नुभो ।

मन्त्री पुनले नेपाली संविधानमा कृषिलाई विषेश स्थान दिइएको बताउँदै कृषिलाई व्यवसायिक बनाउन र कृषिजन्य उत्पादनको बृद्धि गर्न आवश्यक भएको बताउनुभयो ।

उहाँले यसको लागि संविधानले राज्यको स्थानीय, संघ र प्रदेशमा सिंचाई र कृषिलाई विषेश कर्तव्य र अधिकार दिइएको र यसको कार्यान्वयन गर्नुपर्ने बताउनुभयो ।

मन्त्री पुनले जलबायु परिवर्तनको सवालमा बोल्दै खाना, पानी, जमिन र उर्जा सबै क्षेत्रमा यसको सन्तुलनको आवश्यकता भएको बताउनुभयो ।

मन्त्री पुनले नेपाल जस्तो विकाशशील मुलुकमा कृषिले ठूलो हिस्सा ओगटेका तर उच्च प्रविधि, अत्यावश्यक प्रविधि, पानीको प्रयोगमा प्रविधिको कमी जस्ता समस्या नेपाली कृषकले भोगिरहेको उल्लेख गर्नुभयोे ।