काठमाडौं, १ जेठ । कर्मचारीलाई सेवा अवधिभरमा एक पटकमात्रै आरक्षण सुविधा दिन संघीय प्रशासनिक पुनःसंरचना समितिले सरकारसमक्ष सिफारिस गरेको छ ।

सो सिफारिस अनुसार आरक्षणमार्फत सरकारी सेवामा प्रवेश गरेको व्यक्तिले दोस्रो पटक फेरि आरक्षण पाउने छैन । अहिले एउटा पदमा आरक्षणमार्फत सरकारी सेवा प्रवेश गरेके व्यक्तिले अर्को पदमा परीक्षा दिँदा पनि आरक्षण पाइरहेको थियो ।

प्रशासनविद् काशीराज दाहालको नेतृत्वमा गठित उक्त समितिले आरक्षण सुविधाको सदुपयोग हुन नसकेको ठहर गर्दै सरकारलाई पुनरावलोकन गर्न सिफारिस गरेको हो ।

प्रशासनिक सुधारका विभिन्न सुझाव समेटेर तयार पारिएको प्रतिवेदन सोमबार प्रधानमन्त्री केपी शर्मा ओलीसमक्ष पेश गर्दै समितिले नकारात्मक सूची मापदण्ड बनाइ सो सूचीमा परेका सरकारी पदाधिकारीले बढुवाको बाटो नै रोक्न पनि सिफारिस गरेको छ ।

कर्मचारीको तहगत र श्रेणीगत संयोजन गर्नुपर्ने सुझाव दिँदै समितिले त्यसको खाकासमेत सरकारलाई दिएको छ ।