काठमाडौं, ९ जेठ । यसवर्षको उत्तम शान्ति पुरस्कार पूर्व शिक्षामन्त्री एवं साहित्यकार दीनानाथ शर्मालाई प्रदान गरिने भएको छ ।

उत्तम कुँवर स्मारक पुरस्कार सम्मान गुठी २०४४ ले हरेक वर्ष प्रदान गर्ने उत्तम शान्ति पुरस्कार यस वर्ष दीनानाथ शर्मालाई प्रदान गर्न लागेको हो ।

राष्ट्रियसभाका सदस्य समेत रहनुभएका शर्माको पछिल्लो कृति ‘बाह्रखरीको बोटमुनी’ साहित्यिक कृतिलाई पुरस्कृत गर्ने निर्णय भएको पुरस्कार गुठीले जनाएको छ ।

गुठीले समकालीन समय र सौन्दर्य चेतनालाई तीक्ष्ण निजात्मक अनुभूतिका निबन्धमार्फत नेपाली साहित्यमा उल्लेखनीय उपस्थिति जनाउँदै सशक्त कृति प्रदान गरेबापत शर्मालाई वर्ष २०७४ को उत्तमशान्ति पुरस्कार समर्पण गर्ने निर्णय गरेको हो ।

जेठ १२ गते शनिबार नेपाल प्रज्ञा प्रतिष्ठानमा आयोजना हुने कार्यक्रममा सम्मान गरिने पनि गुठीले जनाएको छ ।

शर्माका निबन्ध, कविता, कथा, संस्मरण तथा राजनीतिसम्बन्धी एक दर्जन भन्दा बढि कृतिहरु प्रकाशित भैसकेका छन् । शर्मा राजनीतिसँगै साहित्य, शिक्षा र सामाजिक क्षेत्रमा सक्रिय रहदै आउनुभएको छ ।