डोल्पा, १४ जेठ । कर्णाली प्रदेशको दुर्गम र पहाडी जिल्लाको हवाइ भाडादर पुनरावलोकन तथा समायोजन भएको छ । नेपाल नागरिक उड्यन प्राधिकरणले दुर्गम तथा हिमाली जिल्लामा सात बर्ष पछि भाडादर पुनरावलोकन गरेको हो ।

अब कर्णालीका दुर्गम हिमाली जिल्लामा नियमित सेडुलका उडान गरि चार्टर उडान बन्द हुने भएको नेपाल नागरिक उड्यन प्राधिकरणले जानकारी दिएको छ ।

कर्णाली लगायतका दुर्गम जिल्लाहरुमा भाडादर पुनरावलोकन गरिएको र बिमान कम्पनीसंगको सम्झौता अनुसार चार्टर उडान बन्द गरि सेडुलका उडान भर्ने निर्णय भएको नागरिक उड्यन प्राधिकरण नेपालगञ्जका प्रमुख प्रताबबाबु तिवारीले जानकारी दिनुभयो ।

उहाँका अनुसार दुर्गम क्षेत्रको भाडादर पुनरावलोकन तथा समायोजनका लागि संस्कृति पर्यटन तथा नागरिक उड्यन मन्त्रालयले गएको बैशाख २६ गते मन्त्रीस्तरीय बैठकबाट स्वीकृत गरेको बताउनुभयो ।

कर्णाली तथा दुर्गम हिमाली जिल्लामा तारा,गोमा,सिता,मकालु र नेपाल एयरलाइन्सले उडान भर्दै आएका छन ।

लामो समय देखि कर्णालीका जिल्लामा उडान भर्दै आएको तारा एयरले अब चार्टन उडान नर्भने र सेडुलका मात्र उडान भर्ने तारायएरका नेपालगञ्ज स्टेशन प्रमुख दिलिप कार्किले बताउनुभयो ।उहाँका अनुसार नियमित सेडुलबाटै यात्रुलाइ सेवा प्रदान गरिन्छ तर कसैले निजि रुपमा चार्टर गर्न भने पाउनेछन ।

नेपाल नागरिक उड्यन प्राधिकरणका अनुसार नेपालगञ्ज डोल्पाको भाडादर ५ हजार ३ सय १० तोकेको छ । यस भन्दा पहिले नेपालगञ्ज डोल्पा ८ हजार ८ सय १५ रुपैया थियो ।

त्यसैगरि नेपालगञ्जबाट सिमिकोटका लागि ७ हजार १ सय ९०,राराको लागि ५ हजार ८ सय ४०,जुम्ला र बाजुराका लागि ५ हजार ४ सय ४० एकतर्फि भाडादर कायम भएको छ ।

हाल कामय भएको भाडादर ३२ प्रतिशतले यात्रुलाइ कम पर्ने प्राधिकरणले जनाएको छ । नेपाल नागरिक उड्यन प्राधिकरणले ३५ प्रतिशत भाडा पनि बढाएको छ । यसबाट नियमित सेडुलका उडान भर्दा बिमान कम्पनीहरुलाइ घाटा भने लाग्ने छैन ।

डोल्पाबाट नेपालगञ्जका लागि ३ हजार ८ सय १५ रुपैया भाडादरमा बढेर ५ हजार एक सय भएको जुफाल बिमानस्थलको कार्यालयले जानकारी दिएको छ ।

अब यात्रुले नियमित उडानमा यात्रा गर्न पाउने भएको कारण दुर्गम तथा कर्णालीका जिल्लामा हवाइ उडानमा समस्या हुनेछैन् ।

नेपाल नागरिक उड्यन प्राधिकरणका अनुसार पछिल्लो एक बर्षमा नेपालगञ्ज बिमानस्थलबाट दुर्गम तथा कर्णालीका जिल्लाहरुमा ४१ हजार उडान भरेका छन ।

जम्मा उडानको लगभग आठ हजार उडान मात्र सेडुलका भएको र अन्य सबै चार्टर उडान भएको तथ्यांक प्राधिकरणका नेपालगञ्ज प्रमुख प्रताबबाबु तिवारीले जानकारी दिनुभयो । उहाँले भन्नुभयो,’यो दुर्गम तथा कर्णालीका नागरिकको बाध्यता हो रहर हैन अब त्यसो हुदैन ।’

पछिल्लो समय हुम्लाको मानसरोवरमा तिर्थ यात्रूहरु धेरै जाने भएकोले डोल्पामा दैनिक एक उडान मात्र हुने गरेकोले यात्रा गर्न कठिन भएको नागरिकको गुनासो रहेको छ ।