काठमाडौं,२६ पुस । नेपाल आयल निगमका नवनियुक्त कार्यकारी निर्देशक सुरेन्द्रकुमार पौडेलले निगमको पुनर्संरचना गर्ने बताउनु भएको छ ।

कार्यकारी निर्देशक पौडेलले निगममा हुने गरेका विकृति, विसंगतिको अन्त्य गर्दै निगमका हरेक गतिविधिलाई पारदर्शी बताउने प्रतिवद्धता पनि जनाउनु भयो ।

विहीबार निगमको ४८ औं वार्षिकोत्सवको अवसर पारेर काठमाडौंमा आयोजित एक कार्यक्रममा बोल्दै उहाँले निगमलाई यही अवस्थामा नरहन नदिने योजना पनि अघि सार्नु भयो । निगमको सुधारको लागि शुन्य सहनशीलताको नीतिलाई कडाईका साथ लागू गर्ने नवनियुक्त कार्यकारी निर्देशक पौडेलको भनाई छ ।

त्यस अवसरमा नवनियुक्त कार्यकारी निर्देशक पौडेलले निगमले राष्ट्र निर्माणको अभियानमा पनि ठूलै योगदान गरेको स्मरण गराउनु भयो । उहाँले गएको आर्थिक वर्षमा मात्रै निगमले ५५ अरव रुपैयाँ राजस्व तिरेको पनि जानकारी गराउनु भयो ।

कार्यकारी निर्देशक पौडेलले बुढिगण्डकी जलविद्युत आयोजनाका लागि २७ अरव रुपैयाँ संकलन गरिएको पनि बताउनु भयो । उहाँले निगमले अन्य क्षेत्रमा पनि लगानी गर्न ६ अरव रुपैयाँ व्यवस्था गरेको पनि स्पष्ट पार्नु भयो ।