काठमाडौं । दक्षिण कोरियाले नेपालमा हालै आएको विनाशकारी विपद्बाट ज्यान गुमाएकाप्रति गहिरो समवेदना व्यक्त गर्दै कठिन परिस्थितिमा नेपाल र नेपाली जनतासँग ऐक्यबद्ध रहेको जनाएको छ।

नेपालका परराष्ट्रमन्त्री शिशिर खनाल र दक्षिण कोरियाका परराष्ट्रमन्त्री चो ह्युनबीच भएको टेलिफोन वार्ताका क्रममा दक्षिण कोरियाले विपद्बाट प्रभावित नेपाली जनताप्रति सहानुभूति र समर्थन व्यक्त गरेको हो।

वार्ताका क्रममा नेपालमा पछिल्लो समय उत्पन्न विपद्को अवस्था, प्रभावित नागरिकको खोजी, उद्धार तथा राहत कार्यलगायत विषयमा छलफल भएको बताइएको छ।

परराष्ट्रमन्त्री खनालले नेपाल सरकारले विपद्बाट प्रभावित नागरिकको खोजी, उद्धार र राहतका लागि उपलब्ध सबै स्रोतसाधन परिचालन गरिरहेको जानकारी दक्षिण कोरियाली समकक्षीलाई गराएका छन्।

उनले प्रभावित नागरिकको जीवनरक्षा, सम्पर्कविहीन तथा बेपत्ता व्यक्तिको खोजी र उद्धार तथा आवश्यक राहत उपलब्ध गराउने कार्यलाई सरकारले उच्च प्राथमिकतामा राखेको बताए।

विपद्को चुनौतीपूर्ण अवस्थामा नेपाल सरकारले राष्ट्रिय तथा अन्तर्राष्ट्रिय निकायसँग समन्वय गर्दै खोज, उद्धार र राहत कार्यलाई तीव्रता दिइरहेको पनि वार्ताका क्रममा जानकारी गराइएको छ।

दक्षिण कोरियाको ऐक्यबद्धता

दक्षिण कोरियाका परराष्ट्रमन्त्री चो ह्युनले विपद्का कारण ज्यान गुमाएका व्यक्तिका परिवारप्रति गहिरो समवेदना व्यक्त गर्दै प्रभावित नेपाली नागरिकप्रति दक्षिण कोरियाको साथ र समर्थन निरन्तर रहने बताएका छन्।

दुई देशका परराष्ट्रमन्त्रीबीच भएको वार्तामा विपद्पछिको मानवीय अवस्था र प्रभावित नागरिकलाई आवश्यक सहयोग पुर्‍याउने विषयमा समेत छलफल भएको जनाइएको छ।

Originally published on abcnews.com.np.