चितवन, १७ असार । नारायणगढ– मुग्लिन सडक खण्डमा पैदल हिँडिरहेका एक यात्रु चिप्लिएर त्रिशूली नदीमा खस्दा बेपत्ता भएका छन् ।

जिल्ला प्रहरी कार्यालय चितवनले दिएको जानकारीअनुसार आज बिहान ११ः४५ बजे सर्लाही मदनपुर– ६ का २१ वर्षीय भिखारी चौधरी त्रिशूली नदीमा खसेर बेपत्ता हुनुभएको हो ।

सो सडक खण्ड अन्तर्गत इच्छाकामना गाउँपालिका– ५ स्यालीबजारबाट चौधरी एक सय मिटर तल त्रिशूलीमा खस्नु भएको हो । सो सडकको मुग्लिनबाट २ दशमलव पाँच किलोमिटर नारायणगढ तर्फ शुक्रबार बिहानबाट पहिरो खसेर सडक अवरुद्ध भएपछि पैदल हिँड्दै आउनुभएका चौधरी त्रिशूलीमा खस्नुभएको हो ।

पोखराबाट घरतर्फ जान आउँदै गर्दा तनहँुको आँबुखैरहनीमा बसबाट झरेर हिँड्दै आउने क्रममा घटना भएको प्रहरीले जनाएको छ । पहिरो कटेर बस चढ्ने योजना बनाउनुभएका चौधरी बीचबाटोमानै त्रिशूलीमा खस्नुभएको हो । उहाँको नेपाल प्रहरी र सशस्त्र प्रहरीले खोजीकार्य जारी राखेको छ । सोही सडकमा थप पहिरो आएपछि भाग्ने क्रममा हिजो पनि एक जनाको त्रिशूलीमा खसेर मृत्यु भएको थियो ।

दुई घटनाका मुख्य दुई अभियुक्त पक्राउ

त्यसैगरी चितवन जिल्लामा भएका दुई महत्वपूर्ण घटनाका मुख्य अभियुक्त पक्राउ गर्न प्रहरी सफल भएको छ । गोली प्रहार गरी लुटपाट गरिएको र ठूलो परिणाममा चरेस बरामत गरिएकोमा ती दुबै घटनाको मुख्य दोषी पक्राउ गरिएको आज यहाँ पत्रकार सम्मेलनको आयोजना गरी प्रहरीले जनाएको छ ।

जिल्ला प्रहरी कार्यालय चितवनले आयोजना गरेको पत्रकार सम्मेलनमा दिइएको जानकारी अनुसार भरतपुर महानगरपालिका –२५ मा शुक्रबार साउनी महतोको घरमा गोली प्रहार गरी लुटपाटमा संलग्न मुख्य अभियुक्त पर्वत पकुवा गाविस– ८ स्थायी घर भई हाल भरतपुर २७ देवौलीस्थित ससुराली घरमा बस्ने २७ वर्षीय कृष्ण शाही ठकुरीलाई प्रहरीले भारतको मुम्बईबाट यही असार १५ गते पक्राउ गरेको हो ।
यसअघि सोही घटनाका दुई अभियुक्त पक्राउ परेका थिए । फक्राउपर्नेमा नवलपरासी जिल्ला मध्यविन्दु नगरपालिका– १० अरुणखोला निवासी २१ वर्षीय लक्ष्मण परियार र सोही ठाउँका २० वर्षीय नारायण विक रहेका थिए । रासस