काठमाण्डौं, २३ असोज । सभामुख ओनसरी घर्तीले लोकतन्त्रलाई संस्थागत गर्न आमसंचार माध्यामको भूमिका महत्वपूर्ण हुने विश्वास व्यक्त गर्नुभएको छ ।
सभामुख घर्तीले समय सापेक्ष विकास निर्माणको कामलाई अघि बढाउन पनि संचार माध्यामहरुले अग्रणी भूमिका निर्वाह गर्नुपर्ने आवश्यक्ता औल्याउनुभयो ।

काठमाडौंमा आयोजित अन्तराष्ट्रिय मिडिया सम्मेलनलाई सम्बोधन गर्दै उहाँले पीछडिएका समूदायको आवाजलाई विशेष प्राथमिकता दिन पनि संचार माध्यामहरुलाई सुझाव दिनुभयो । उहाँले प्रेस तथा अभिव्यक्ति स्वतन्त्रताको रक्षा गर्ने दायित्व सरकारको भएको पनि स्मरण गराउनु भयो ।

नेपाल पत्रकार महासंघका अध्यक्ष गोविन्द आचार्यले प्रेस तथा अभिव्यक्ति स्वतन्त्रता हनन् हुन नदिन आफूहरु सचेत रहेको बताउनुभयो । उहाँले राज्यका सबै तहलाई प्रेस तथा अभिव्यक्ति स्वतन्त्रता हनन् हुने खालका कानुन निर्माण नगर्न पनि सजग गराउनुभयो । महासंघका अध्यक्ष आचार्यले संविधानले स्थानीय तहलाई समेत कानुन बनाउने अधिकार दिएकाले त्यसमा प्रेस स्वतन्त्रता हनन नहोस् भन्ने तर्फ राज्यका सबै निकायको ध्यान जानुपर्नेमा पनि जोड दिनुभयो ।

सम्मेलनमा सहभागी भारत, पाकिस्तान, बंगलादेश, श्रीलंकासहितका देशका वरिष्ठ संचारकर्मीहरुले प्रेस तथा अभिव्यक्ति स्वतन्त्रताको क्षेत्रमा नेपालले हात परेको सफलताको प्रशंशा गरेका थिए ।