काठमाडौं, १७ असार । लोकसेवा आयोगले स्थानीय तहका विभिन्न पदहरुमा गरेको खुला विज्ञापनको फर्म भर्ने म्याद आज सकि“दैछ ।
आयोगले दरखास्तका लागि दिएको अन्तिम समयसीमाको अघिल्लो दिनसम्म ४ लाख १८ हजार ४७ जनाको आवेदन परेको छ ।

आयोगले गत जेठ १५ मा स्थानीय तहका प्राविधिक र अप्राविधिक पदहरुमा ९ हजार १ सय ६१ कर्मचारी माग गर्दै असार ३ सम्म ‘सिंगल’ र १० गतेसम्म ‘डबल’ दस्तुर तिरेर आवेदन दिन समय तोकेको थियो । अनलाइन प्रणालीमा समस्या आएपछि आयोगले दोब्बर दस्तुर तिरेर दरखास्तका लागि आज असार १७ गतेसम्मको समय दिएको छ । आवेदन दिने म्याद आज राति १२ बजेसम्मका लागि भएकाले यो संख्या अझै बढ्न सक्नेछ । स्थानीय तहका लागि पहिलोपटक गरिएको विज्ञापनमा सबैभन्दा बढी आवेदन पुरुष उम्मेदवारकोतर्फबाट परेको छ । हालसम्म ३ लाख १८ हजार ६ सय ४७ आवेदन पुरुषको तर्फबाट मात्रै परेको छ ।

पुरुषको तुलनामा महिलाको आवेदन भने निकै कम छ । ९९ हजार ४ सय महिलाले मात्रै असार १६ सम्म आवेदन बुझाएका छन् । यो पुरुषको भन्दा २ लाख १९ हजार २ सय ४७ ले कम हो । समावेशीतर्फ भने आदिवासी जनजाति आवेदन बुझाउनेको पहिलो नम्बरमा छन् । आदिबासी जनजातितर्फबाट ४१ हजार ८ सय ७ आवेदन परिसकेको छ । त्यस्तै मधेसीबाट २३ हजार ४ सय ४९, दलितबाट २ हजार ९ सय ७०, अपांगबाट १ सय ३७ र पिछडिएको क्षेत्रबाट १ सय १३ जनाले स्थानीय तहको सेवाका लागि आवेदन दिएका छन् ।