काठमाडौँ, २२ साउन । जिल्ला समन्वय समितिका प्रमुख जयबहादुर श्रेष्ठले राहत सामग्रीमा अनियमितता गरेको भनेर आफूलाई लागेको आरोपको खण्डन गर्नुभएको छ । प्रदेशसभा सदस्य मोहनकुमार खड्काले राहतमा अनियमितता गरेको भन्दै यही साउन १७ गते प्रशासनमा उजुरी दिनुभएको थियो ।

प्रदेशसभा सदस्यले राजनीतिक प्रतिशोधका आधारमा आफूलाई विवादमा तानेको भन्दै प्रमुख श्रेष्ठले आरोपको खण्डन गर्नुभएको हो । कार्यालयमा आज पत्रकार सम्मेलन गर्दै उहाँले कमजोरी भए कारवाही भोग्न तयार रहेकाले आरोप प्रमाणित गर्न चुनौती दिनुभयो ।

विसं २०७४ माघ ११ गतेको जिल्ला दैवीप्रकोप उद्धार समितिको निर्णय र सोहीअनुसार जिल्ला प्रशासन कार्यालयको चलानी नम्बर ११२३ को पत्रअनुसार जिससले निर्णय गरेर राहत सामग्री वितरण गरेको प्रमुख श्रेष्ठको दाबी छ । जिससले दिएका तारजाली र राहत सामग्रीका बारेमा जिससले आन्तरिक अनुगमन गरेर सार्वजनिक गर्ने प्रमुख श्रेष्ठले बताउनुभयो ।

स्थानीय सडक सुधार तथा जीविकोपार्जन कार्यक्रम मातहतका सामग्रीका बारेमा जानकारी नभएको जिससले निकालेको प्रेस विज्ञप्तिमा उल्लेख छ । प्रदेश नं १ का अर्थसमिति सभापतिसमेत रहनुभएका खड्काले जिल्ला समन्वय समितिविरुद्ध प्रशासनमा मुद्दा दिनुभएको थियो । मुद्दामा जिल्लाको विभिन्न ठाउँमा रहेको भण्डारण कक्षबाट त्रिपाल र तारजाली मनोमानी ढङ्गले बाँडिएको विषयमा छानविन गरी दोषीउपर कारवाहीको माग गरिएको छ ।