काठमाडौँ, १५ कात्तिक ।  महिला, बालबालिका तथा समाज कल्याण मन्त्री विक्रमबहादुर थापाले पछिल्लो पटक भएको राजनीतिक ध्रुवीकरणले सरकारको स्थायित्व र समाजको समृद्धि हुने बताउनुभएको छ ।

राष्ट्रिय प्रजातन्त्र पार्टी काठमाडौँ क्षेत्र नं ८ ले आज यहाँ आयोजना गरेको कार्यक्रममा मन्त्री थापाले मुलुकमा दिगो शान्ति र राजनीतिक स्थिरताका लागि आगामी निर्वाचनमा लोकतान्त्रिक गठबन्धनको नेतृत्व आवश्यक रहेको बताउनुभयो ।

लोकतान्त्रिक गठबन्धन निर्माण समयको माग भएको बताउँदै प्रजातान्त्रिक अभ्यासलाई संरक्षण गर्न अहिले चुनौती रहेको बताउनुभयो । देशमा पछिल्लोपटक भएको राजनीतिक ध्रुवीकरणले सरकारको स्थायित्व र समाजको समृद्धि हुने बताउँदै उहाँले आगामी निर्वाचनमा जनताले लोकतान्त्रवादी र राष्ट्रवादी शक्तिलाई अग्रस्थानमा लैजाने विश्वास व्यक्त गर्नुभयो ।

पार्टीका केन्द्रीय सदस्य देवेन्द्र प्रधानले लोकतान्त्रिक गठबन्धनका उम्मेदवारहरुले संयुक्त चुनावी सभा तथा मतदातालाई प्रशिक्षण कार्यक्रम सञ्चालन गर्नुपर्नेमा जोड दिनुभयो ।

कार्यक्रम आयोजक संस्थाका अध्यक्ष दिनेश अधिकारी, राप्रपा महानगर अध्यक्ष कृष्ण वज्राचार्यलगायतले झापा–३ मा गठबन्धनभित्र देखिएको अविश्वास र आशंकाले लोकतान्त्रिक गठबन्धनमा समेत समस्या आउन सक्ने भएको हुँदा नेतृत्वले चाँडो समाधान खोज्नुपर्ने सुझाव दिनुभयो ।