काठमाडौं, ३ पुस । सुन्दर र समृद्ध शहरको सपना बाड्छ काठमाडौ महानगर । शहरका सामान्य खाल्डाखुल्डी पनि पुर्न सक्दैन महानगर । सडकमा धुलो, धुँवा उत्तिकै उडिरहेकै छन् । जनजिविकामा सुधार नआएको, महानगरको परिवर्तन प्रत्यक्ष अनुभुति गर्न नपाएको नगरबासीको गुनासो ज्युँको त्युँ छ । यद्यपी महानगरले विभिन्न ठुला काम देखाउने कोसिस भने गरि नै रहेको छ । काठमाडौँको धुलो सफा गर्न ब्रुमर किनेको भएपनि प्रभावकारी रुपमा सञ्चालन गर्न सकेन । उपयोगिता शुन्यप्रायः छ । महानगरले विभिन्न किसिमका रोगहरुको उपचारका निमित्त आवश्यक स्वास्थ्य सेवा तथा नियमित स्वास्थ्य परीक्षण जस्ता कार्यहरु गर्न भन्दै नेपाली सेनासँग सझदारीपत्रमा हस्ताक्षर गरेको छ । यस अन्तर्गत विशेषगरी जेष्ठ नागरिकहरुको लागि ओ.पी.डी. सेवा, आपतकालीन स्वास्थ्य सेवा, मृगौलाका बिरामीहरुका लागि हेमोडाईलासिस सेवा आदि सञ्चालन गरी स्वास्थ्य सेवालाई थप प्रभावकारी बनाउने बताइएको छ ।

सेवा सञ्चालन गर्न बिरेन्द्र अस्पताल छाउनीमा ३ करोड मुल्य बराबरको सामान खरिदको लागि सहमति पत्रमा हस्ताक्षर गरेको छ । काठमाडौँबासी र काठमाडौँ महानगरका कर्मचारीले सेवा लिनसक्ने र वीरेन्द्र अस्पतालले स्तरिय सेवा प्रवाह गर्नेमा काठमाडौँ महानगरपालिकाका प्रमुख बिद्यासुन्दर शाक्यले विश्वास व्यक्त गरेका छन् । नेपाली सेना र काठमाडौँ महानगरपालिकाबिच वातावरण तथा पर्यावरणीय क्षेत्रमा सहकार्य हुँदै आएकोमा अब स्वास्थ्य सेवासँग जोडिएर जनसेवा गर्न शुरु गरिएको महानगरको भनाइ छ । नेपाली सेनाले काठमाडौँ शहर हराभरा बनाउने महानगरको अभियानमा साथ दिइरहेको बताएको छ । प्रदुषणमुक्त प्लाष्टिक मुक्त काठमाडौँ बनाउन र टुडिखेललाई अझ समृद्ध गर्न नेपाली सेना र महानगरपालिकाबीच सहमती सहकार्य जारी रहने नेपाली सेनाका प्रधानसेनापनि पूर्णचन्द्र थापाले बताए । महानगरपालिकाले एक पछि अर्को गर्दै विभिन्न ठाउँमा विभिन्न सम्झौताहरु गर्न थालेको छ । त्यसको परिणाम केही समयपछि देखापर्ला नै । तर जनगुनासोको चाङ भने दिनप्रतिदिन बढि नै रहेको छ, जनअपेक्षा अनुरुपको काम गरेर जनतालाई प्रत्यक्ष अनुभुति गराउनु आवश्यक छ । काठमाडौँ महानगरबासिको माग अनुरुप नै यसरी बिरेन्द्र अस्पतालमा स्वास्थ्य सेवामा सहकार्य गरिएको काठमाडौँ महानगरपालिकाका प्रवक्ता ईश्वरमान डंगोल बताउँछन् ।

महानगरपालिकाको स्वास्थ्य क्षेत्रमा गरेको यो लगानी सकारात्मक रुपमै लिन सकिन्छ । तर, महानगरले जनस्वास्थ्यमा अझै ध्यान पुराउन सकेको छैन । सार्वजनिक स्थलमा शौचालय बनाउन सकेको छैन । भएको ठाउँमा पनि प्रभावकारी रुपले सञ्चालन गर्न सकेको छैन । यस्ता यावत् सानातिना सवालको सम्बोधन गर्नपनि महानगरले ध्यान दिनुपर्छ । रचनात्मक काम गर्न ध्यान दिनुपर्छ केवल आएको बजेट व्यवस्थापनको निम्ति विभिन्न योजना बनाउने होइन कि प्रभावकारी रुपमा सञ्चालन, कार्यान्वयन र प्रतिफल आउने गरी काम गर्नु आवश्यक छ ।