काठमाडौं, १३ मंसिर । समाजवादी पार्टी, नेपालले सरकारलाई दिएको समर्थन फिर्ता लिएसँगै राजपा नेपाल सरकारमा जानसक्ने चर्चा शुरु भएको छ । समाजवादीसँग राजपाले एकिकरण गर्ने विषय दुविधामा परेको छ ।

सरकारमा जानुपूर्व संविधान संशोधन लगायतको विषय संबोधन गर्ने भनि तत्कालिन नेकपा(एमाले) र तत्कालिन नेकपा माओवादीका अध्यक्षद्धय केपी शर्मा ओली र पुष्पकमल दाहाल प्रचण्डसँग हस्ताक्षर गरी समाजवादी पार्टीले हस्ताक्षर गरेको थियो । तर हालसम्म सरकारले संविधान संशोधनको निम्ति कुनै काम नगरेको भन्दै समाजवादी पार्टी सरकारमा बस्नुको कुनै औचित्य नभएको भन्दै पार्टी भित्र र बाहिरबाट सरकार छाड्न दबाब बढिरहेको थियो । अन्तत्ः सरकारले संविधान संशोधन नगरेको भन्दै समाजवादी सरकारबाट बाहिरियो । र प्रतिपक्षको ब्रेन्चमा पुगेको छ ।

यता, समाजवादी पार्टीले सरकार छोडे एकिकरण गर्ने तयारीमा रहेको राजपा नेपाल भने समाजवादी पार्टी बाहिरिएपछि एकिकरणको निम्ति खासै चासो देखाएको छैन । हिजो एकिकरणको निम्ति सरकार छाड्नुपर्ने सर्त राजपाले तेर्साउँदा समाजवादी सरकार छोड्न तयार भएन । आज समाजवादीले एकिकरणको निम्ति आह्वान गरिरहँदा राजपा नेपाल भने एकाएक सत्तारुढ नेकपासँग नजिकिएको छ । सत्तारुढ नेकपासँग राष्ट्रिय सभा निर्वाचनमा तालमेल गरेको राजपा सरकारमा जाने तयारीमा छ । सरकारका मन्त्रीसहित उपसभामुख लिएर सरकारमा जाने छलफल भित्रभित्रै चलिरहेको छ ।

संविधान संशोधनको मुद्धामा समाजवादी भन्दा आक्रमक देखिएको राजपा समाजवादी पार्टी, सरकारले संविधान संशोधन गरेन भनेर फिर्ता हुँदा राजपा भने संविधान संशोधनकै सहमती गरेर सरकारमा जाने चर्चा राजनीतिक वृत्तमा चलिरहेको छ । छलफल गर्नु सामान्य, स्वभाविक र राजपा सरकारमा जानु नै नहुने भन्ने नरहेको राजपा नेताहरु टिप्पणी गर्छन् । यद्यपी, समाजवादीसँग एकिकरणको बाटो खुल्लै रहेको राजपा नेपालका नेता लक्ष्मणलाल कर्ण बताउँछन् ।

मधेश आन्दोलनपछि शक्तिशाली राजनीतिक शक्तिको रुपमा उदाएको मधेशी दलहरु गुट उपगुट, पद लोलुपता र सत्तास्वार्थका कारण टुक्रा टुक्रा भए र सिद्धिए । पुनः चुनावी प्रयोजनका लागि एक भएका केही मधेशी दलको भावना, लक्ष्य, उदेश्य अझै मिलेको छैन । मधेसी दलहरु प्रति नै एक अर्कामा अविश्वास, आशंका र धोकाको श्रृंखलामा छन् । मधेश आन्दोलन र आफ्ना मुद्धालाई आफैले कमजोर बनाइरहेका छन् । एउटा सरकारमा हुँदा अर्को मधेशको मुद्धा बोक्ने, केवल सत्तामा जाने भर्याङ मात्र मुद्धालाई बनाइरहेको यथार्थ हो । नेकपा वृत्तमा उपसभामुख राजपालाई दिने चर्चा चलिरहँदा नेकपा संसदीय दलका उपनेता सुभाषचन्द्र नेम्वाङ उपसभामुख अर्को दललाई दिने भएपनि कसलाई दिने भन्नेमा निष्कर्षमा पुग्न नसकेको बताउँछन् ।

प्रदेश २ मा समाजवादी र राजपाको गठबन्धन सरकार छ । राजपाले संघीय सरकारमा जानेत हो भने प्रदेश २ को सरकारमा पनि नेकपा र राजपाको गठबन्धन हुनसक्छ, यसमा समाजवादी सशंकित छ । समाजवादीलाई गरेको सहमतीमा सरकारले धोका दिएकोमा राजपालाई पनि धोका हुने भन्दै समाजवादी पार्टी राजपालाई सरकारमा जान रोक्ने कसरतमा देखिन्छ ।

सरकारमा हुँदा सबै ठिक, सरकारमा नहुँदा सबै बेठिक हुने मधेशवादी दलको सत्ता स्वार्थको राजनीतिमा बदलाब आउनु जरुरी छ । साच्चैँ मुद्धाको निम्ति राजनीति गरेको हो भने त्यसमा अडिएर बस्नुपर्छ । उनिहरुको उचित मागको सहमती गरे बमोजिम माग पुरा गर्न सरकारले पनि ध्यान दिनुपर्छ खालि च्याखेदाउ थापेर बस्नु हुँदैन ।