काठमाडौं, ११ चैत । गैंडाकोट नगरपालिकाका प्रमुख छत्रराज पौडेलले कोरोनाको संक्रमणबिरुद्ध लड्न आफूले चढ्दै आएको गाडी केही समयका लागि प्रहरीलाई दिनुभएको छ । उहांले चढ्दै आएको बा२झ ३४०४ नम्बरको गाडी इलाका प्रहरी कार्यालय गैंडाकोटलाई बुझाउनुभएको हो कोरोना भाइरसविरुद्ध लड्न आवश्यक सुरक्षा र ब्यवस्थापनको प्रबन्ध गर्न गाडी प्रहरीलाई दिएर सहयोग गरेको प्रमुख पौडेलले बताउनुभयो । उहांले प्रहरीसँग सिमित स्रोत साधन हुने र अभावसमेत देखिने गरेकोले तेलसहित गाडी दिएको बताउनुभयो । लकडाउनको समयमा पनि प्रहरीका लागि सवारीसाधनको आवश्यकता पर्ने भएका कारण गाडी दिएको नगर प्रमुख पौडेलको भनाइ छ ।

उहांले यसको सदुपयोग सही कामका लागि गरिने बताउनुभयो । नगर प्रमुख पौडेलले उपप्रमुखले चढ्ने गाडी नगरपालिकाका स्वास्थ्यका कर्मचारीलाई लागि दिएको बताउनुभयो । इलाका प्रहरी कार्यालय गैंडाकोटका प्रमुख चन्द्र बहादुर थापाले नगरवासीको सेवा गर्नका लागि यो समयमा धेरै स्रोत साधनको आवश्यकता पर्ने भन्दै नगर प्रमुख पौडेलले गाडीको साँचो प्रहरीलाई बुझाएको बताउनुभयो ।