काठमाडौं, २५ चैत । ज्वरो नाप्ने थर्मल गन कालोबजारी गर्ने जगदम्बा समूहको जगदम्बा स्टिलका मालिक सुलभ अग्रवाल पक्राउ परेका छन्। कोरोना भाइरसको महामारीसँग विक्री ह्वात्तै बढेको बेला कालोबजारी गर्ने अग्रवाललाई नक्सालबाट पक्राउ गरेको महानगरीय प्रहरी अपराध महाशाखाले जनाएको छ।

३ हजारदेखि पाँच हजार रुपैयाँसम्म पर्ने थर्मल गनलाई अग्रवालले १५ हजार रुपैयाँसम्म विक्रि गरिरहेको सुचनाका आधारमा उनलाई पक्राउ गरिएको महाशाखा स्रोतले जनाएको छ। प्रहरीले उनको गाडिबाट ६७ वटा थर्मल गन समेत बरामद गरेको छ।
शंकर ग्रुपले हालै शनिबार मात्र चीनको ग्वान्झाओबाट सात टन मेडिकल सामग्री ल्याएको थियो। एक निजी लजिस्टिक कम्पनीले मेडिकल सामग्री लिन नेपाल एयरलाइन्सको विमान चार्टर गरेको थियो ।

ग्वान्झाओ जाने बेला २२ टन सामान ल्याउने भनिएपनि जहाजले ७.५ टन मात्र लिएर फर्कियो । त्यसबेला ल्याइएको स्वास्थ्य सामग्रीमा सीजी ग्रुप, नर्भिक अस्पताल र केही मेडिकल सप्लायर्सबाहेक बाँकी सामान शंकर ग्रुपकै थियो । त्यही बेला शंकर ग्रुपले नै अरुको सामान नल्याउन लगाएको हुनसक्ने आशंका गरिएको थियो । अहिले शंकर ग्रुपका सञ्चालक नै कालोबजारीको आरोपमा पक्राउ गरेपछि त्यसबेला आफूहरुले गरेको आशंका पुष्टि भएको एक व्यवसायी बताउँछन् ।

उनले कालोबजारी गर्न कीर्गिस्तानमा अवैतानिक महाबाणिज्य दूत समेत रहेका उनले कूटनीतिक नियोगकै नम्बर प्लेट प्रयोग गरेका थिए । नक्सालमा २०९ सीसी वान नम्बरको गाडीमा चढेर अग्रवाल थर्मल गन विक्री गर्न पुगेका थिए । तर, सामान दिन नपाई अग्रवाल समातिएको प्रहरीले जनाएको छ ।

महानगरीय अपराध अनुसन्धान महाशाखाले अग्रवाललाई सोधपुछ गर्ने काम भइरहेको जनाएको छ ।