काठमाडौं, २७ चैत । चाइना फाउन्डेसन फर पोभर्टी एलिभेसन नेपाल (सीएफपीए) र गुडविल फाउन्डेसन (जीडब्लुएफ)ले नेपालमा कोरोना भाइरसको संक्रमण फैलिन नदिन समुदायस्तरलाई विभिन्न सहयोग सामग्री हस्तान्तरण गरेका छन् ।

चीनका यी दुई संस्थाले नेपालमा कोरोना भाइरसको संक्रमण फैलिन नदिन सचेतनामुलक कार्यक्रम गर्दै विभिन्न स्थानीय तहमा हात धुने सामानहरु समेत वितरण गरेका हुन् । काठमाडौं महानगरपालिका वडा नं. १७ का वडाअध्यक्षलाई सीएफपीए र जीडब्लुएफले २०० लिटर क्षमताको ट्यांकी सहित २० वटा हातधुने सामाग्री हस्तान्तरण गरेका छन् । राजधानीको मुख्य पर्यटकीय क्षेत्र ठमेल रहेको १७ नं. वडालाई हस्तान्तरण गरेका यी हातधुने सामाग्री लकडाउनको बीचमा अत्यावश्यक कामका लागि घर बाहिर निस्कनपर्ने आम सर्वसाधारणलाई सडक किनारामै हातधुन सहयोगी विश्वास गरिएको छ ।

यसैगरी सीएफपीए र जीडब्लुएफकै सहयोगमा दक्षिणकाली नगरपालिकामका विभिन्न स्थानमा हात धुने ठाउँ बनाइएको छ । नगरपालिकाका प्रतिनिधिलाई हात धुने सामाग्री हस्तान्तरण गरिएको हो । यस्तै, कीर्तिपूर नगरापालिका, ललितपुर र प्रदेश २ को जनकपुरमा पनि १०५ वटा हात धुने सामानहरु स्थानीय तहलाई हस्तान्तरण गरिएको छ ।

यी दुवै चिनिया संस्थाले नेपालमा गरिबी निवारण र शिक्षाको क्षेत्रमा काम गर्दै आएका छन् । गुडविल फाउन्डेशनले केही दिन अघि चीनको गन्जाओस्थित नेपाली महावाणिज्यदूतबासलाई ५० हजार मेडिकल मास्क सहयोग हस्तान्तरण गरेको थियो । २०७२ को विनाशकारी भूकम्पको समयमा पनि गुडविल फाउन्डेशनले उद्दार तथा राहतमा सहयोग गरेको थियो ।