बागलुङ । कोरोना संक्रमितमध्ये सबैभन्दा जेष्ठ संक्रमित मनकुमारी पौडेलले पनि रोगलाई जित्नुभएको छ । अस्पतालबाट उहालाई अहिले डिस्चार्ज गरिएको छ ।

धौलागिरी अञ्चल अस्पतालको आईसोलेसनमा उपचाररत बागलुङकी ६५ बर्षिय आमाको चौथोपटक गरिएको थ्रोट स्वाव परीक्षणको नतिजा नेगेटिभ आएको थियो ।
डिस्चार्जपछि आमाले खुशी हुँदै स्वास्थ्यकर्मीसबैलाई धन्यवाद दिनुभयो । आफू पहिलो आत्मविश्वास, दोस्रो नियमित तातोपानी र तेस्रो स्वास्थ्यकर्मीको नियमित हेरचाहले बाँचेको प्रतिक्रिया दिनुभएको छ ।

यसअघि बिहिबार गरिएको तेस्रो पटकको परीक्षणमा पनि उहाको कोरोना संक्रमण रिपोर्ट नेगेटिभ देखिएको थियो । प्रादेशिक जनस्वास्थ्य प्रयोगशाला पोखराका अनुसार उहाको दोस्रो फेजको रिपोर्ट समेत नेगेटिभ आएकाले उहामा कोरोनाको संक्रमण सकिएको पुष्टि भैसकेको छ । उहा छैटौं कोरोना संक्रमित महिला हुनुहुन्छ । बेल्जियमबाट कतारहुँदै नेपाल आउनुभएकी उहामा गत चैत २० गते कोरोना संक्रमण देखिएको थियो ।