काठमाडौं, ९ बैशाख ।  नेपाल कम्युनिस्ट पार्टी (नेकपा) सचिवालय सदस्य माधवकुमार नेपालले पार्टी एकतामा अविश्वास पैदा हुने काम–कुरा गर्न नहुने बताउनुभएको छ । पूर्वप्रधानमन्त्रीसमेत रहनुभएका बरिष्ठ नेता नेपालले आज बिज्ञप्ती जारी गर्दै यस्तो अपिल गर्नुभएको हो ।

सरकारले राजनीतिक दल सम्बन्धी ऐन संशोधनको अध्यादेश ल्याएपछि विज्ञप्ति निकाल्दै नेपालले कोरोना सङ्क्रमणमा ध्यान केन्द्रित गर्नुपर्ने बेला ध्यान अन्यत्र मोड्न नहुने बताउनु भएको हो । “कोभिड–१९ को महामारीले विश्वसहित नेपाललाई आक्रान्त पारिरहेका बेला नेपाल सरकार तथा सरकारको नेतृत्व गरिरहेको पार्टीका हैसियतले सिंगो राष्ट्र, हाम्रो पार्टीसहित अन्य पार्टीका नेता, कार्यकर्ता, जनताको ध्यान महामारीको सङ्क्रमका विरूद्ध लड्ने क्रममा केन्द्रित हुनुपर्छ । यस्तो विषम परिस्थितिमा सरकार र पार्टी कहीँबाट पनि मूल जिम्मेवारीबाट ध्यान अन्यत्र मोड्ने, संविधान र कानुनी शासनका मान्यतामा प्रहार हुने, अविश्वास आशंका उत्पन्न हुने तथा पार्टीको एकतामा आघात पुग्नसक्ने काम–कुरा हुनुहुँदैन,” उहाले विज्ञप्तिमा भन्नु भएको छ ।