काठमाडौं, १० बैशाख ।  कोभिड–१९ को सङ्क्रमण रोक्न भारत सरकारले नेपाललाई औषधीजन्य मेडिकल सामाग्री हस्तान्तरण गरेको छ ।भारत र नेपाल बीच जारी सहकार्यको क्रममा भारत सरकारका तर्फबाट नेपालका लागि भारतीय राजदूत विनय मोहन क्वात्राले नेपालका स्वास्थ्य तथा जनसंख्यामन्त्री भानुभक्त ढकाललाई २३ टन औषधी हस्तान्तरण गर्नुभएको हो ।

भारतका तर्फबाट हस्तान्तरण गरिएको औषधीहरुमा पारासिटामोलको ३.२ लाख डोज र हाईड्रोक्सीक्लोरोक्वीनको २.५ लाख डोेज गरीे कुल ८.२५ लाख डोज अत्यावश्यक औषधिहरु रहेका छन् । यस पहलले सबै अवस्था र परिस्थितिमा नेपाल र भारतबीच सहकार्य जारी रहने प्रतिबद्धतालाई दर्शाउने मन्त्री ढकालले बताउनुभयो ।

यस अघि भारतीय प्रधानमन्त्री नरेन्द्र मोदी २०७६ चैत्र २ गते सार्क राष्ट्रका नेताहरुसँग भिडियो कन्फरेन्स मार्फत सार्क कोभिड–१९ आपतकालीन कोषमा १० मिलियन अमेरिकी डलर प्रदान गर्ने समेत बताउनु भएको छ । भारतीय प्रधानमन्त्री मोदीको छिमेकी मित्र राष्ट्रहरुलाई हरसम्भव सहयोग गर्ने प्रतिवद्धता रहेको भारतीय राजदूत क्वात्रा बताउनुभयो ।

भारतीय तथा नेपाली स्वास्थ्यकर्मीहरु यस महामारीको रोकथाम तथा नियन्त्रणका लागि आपसी सहकार्यमा प्रयत्न गरिरहेको बताउदै उहाले सङ्कटको यस घडीमा नेपाल तथा अन्य दक्षिण एसियाली साझेदार मुलुकहरुसँग एकसाथ तयारी गर्न, कदम चाल्न र सफलता प्राप्त गर्न भारत प्रतिबद्घ रहेको समेत बताउनुभएको छ । यसैवीच भारतिय प्रधानमन्त्रीलाई प्रधामन्त्री केपी शर्मा ओलीले नेपालाई औषधी पठाएकोमा धन्यवाद दिनु भएको छ । उहाले आफ्नो ट्वीटरमा मार्फत समकक्षि मोदीलाई र भारतियदुतावासलाई धन्यवाद दिनुभएको छ ।