संखुवासभा, १२ मंसिर । पूर्वी पहाडी जिल्ला संखुवासभा जिल्लाको सबै मतपेटिका सदरमुकाम खाँदबारीमा संकलन गर्ने कार्य सकिएको छ ।

पहिलो चरणअन्तर्गत मंसिर १० गते सम्पन्न संघीय प्रतिनिधीसभा र प्रदेशसभा निर्वाचनको जिल्लाभरिको मतपेटिका सदरमुकाममा संकलन गरिएको हो । जिल्लाको विकट दुर्गम क्षेत्र मानिने किमाथाङ्का, थुदाम, रिदाक, हटिया, चेपुवा, हुङगुङ र च्याम्ताङ लगायतका मतदान केन्द्रहरुको मतपेटिका सोमबार नै हेलिकपटर मार्फत ल्याउने प्रयास गरिएपनि मौसम खराब भएका कारण स्थगित भएका थिए ।

उक्त क्षेत्रको मतपेटिका हेलिकप्टर मार्फत मंगलबार बिहान सदरमुकाम खाँदबारी ल्याइएपछि जिल्लाभरका मतपेटिका संकलन कार्य सकिएको मुख्य निर्वाचन अधिकृत प्रकाश राउतले जानकारी दिए । उनको अनुसार, विकट दुर्गम र सुरक्षा चुनौती देखिएका स्थानबाट नेपाली सेनाको हेलिकप्टरबाट मतपेटिका सदरमुकाम ल्याइएको हो । सुरक्षा चुनौती देखिएका भोटखोला गाउँपालिकामा रहेका किमाथाङका, थुदाम, रिदाक, हटिया, चेपुवा, हुङगुङ्र, च्याम्ताङ र सिलिचोङ गाउँपालिकामा रहेको खेम्पालुङ आधारभूत विद्यालय, गङथाला केन्द्र र मकालु गाउँपालिकामा रहेको दिपज्योती आधारभूत विद्यालय केन्द्र याफूको मतपेटिका नेपाली सेनाको हेलिकोप्टरबाट ल्याइएको बताए ।

संखुवासभामा १ सय ३ मतदान स्थलका १ सय ५३ मतदान केन्द्र रहेको छ । ति सबै मतदान केन्द्रहरुबाट मतपेटिका सदरमुकाम ल्याइसकिएको र मतपेटिका जिल्ला समन्वय समितिको सभाहलमा राखिएको छ । मतपेटिका र अन्य सामग्रीहरु सीसी क्यामराको निगरानीमा राखिएको छ ।

सुरक्षा जिम्मा सशस्त्र, नेपाल प्रहरीलाई, राजनितिक दलका कार्यकर्ताहले पनि निगरानी गर्ने
मतगणना नहुँदासम्म मतपेटिकालगायतका सामग्रीको सुरक्षा जनपथ र सशस्त्र प्रहरीले गर्ने निर्णय भएको छ ।

मुख्य निर्वाचन अधिकृत राउतले प्रहरीसँगै राजनीतिक दलका प्रतिनिधिहरुपनि सँगै रहने व्यवस्था मिलाइएको जानकारी दिए । एक प्रतिनिधिसभा र दुई प्रदेशसभा सदस्यका लागि भएको निर्वाचनमा संखुवासभामा ६५ प्रतिशत मत खसेको थियो । एक लाख ५ हजार ८५ मतदाता रहेको संखुवासभामा ६९ हजार १ सय जनाले मतदान गरेको जिल्ला निर्वाचन कार्यालयले जनाएको छ । सोमबार बसेको मुख्य निर्वाचन अधिकृत, राजनीतिक दल, उम्मेदवार, सुरक्षा निकायसहितको सर्वपक्षीय बैठकले प्रतिनिधिसभा, प्रदेशसभा र समानुपातिकका मतपेटिका छुट्टा–छुट्टै स्थानमा राख्ने निर्णय गरेको थियो ।

उच्च सुरक्षा सतर्कताका साथ मतपेटिकालाई राख्ने र मंसिर २१ गते बेलुका ५ बजेपछि मतगनणा सुरु गर्ने सर्वदलीय सहमति भएको छ । मतपेटिका राखिएका कोठामा राजनीतिक दलले समेत आ–आफ्नो ताल्चा लगाउन मिल्ने गरी सहमति गरिएको छ ।