एजेन्सी । विश्वभर कोरोना भइरस संक्रमणको प्रकोप कायमै छ । यसको रोकथाम र उपचारका लागि सबै मुलुकहरु प्रयासरत पनि छन । त्यस्तै रुसमा पछिल्लो २४ घण्टामा ९, हजार ७०९ जनामा संक्रमण पुष्टि भएको छ । योसंगै कोरोना संक्रमितको संख्या २ लाख ८१ हजार ७५२ पुगेको छ ।

यो तथ्यांक अमेरिका पछिको दोस्रो ठूलो हो । त्यसैगरि पछिल्लो २४ घण्टामा ९४ जनाको मृत्यु भएको छ । योसंगै मृतकको संख्या २,६३१ पुगेको छ । यतिखेर रुसको राजधानी मस्कोको अवस्था अत्यन्तै भयावह बनेको छ ।

जहाँ कुल संक्रमितको संख्या १ लाख ४२ हजार ८२४ रहेको छ । यो तथ्यांक देशभरकै तुलनामा आधा हो । अर्थात रुसमा कोरोना संक्रमित विरामीहरु मध्ये आधा संख्याका विरामीहरु राजधानी मस्कोमा मात्रै छन ।

अवस्था अत्यधिक चिन्ताजनक बनेपछि रुसी राष्ट्रपति भ्लादिमीर पुटिनले देशका ८५ क्षेत्रीय प्रमुखहरुसंग भिडियो कन्फ्रेन्सद्वारा छलफल गरेका छन । राष्ट्रपति पुटिनले लकडाउनलाई केही खुकुलो गर्ने आशय ब्यक्त गरेपनि मस्कोका मेयर सर्गेई सबेयानिनले लकडाउनलाई खुकुलो बनाउने वा समाप्त गर्ने भन्ने बारे कुनै हतार नभएको प्रतिकृया दिएका छन । मेयर सर्गेईले दैनिक ४० हजार बढीको परीक्षण गर्न सकिने क्षमता रहेको भन्दै राजधानी शहर मस्कोमा तिब्र गतिमा फैलिएको कोरोनाको प्रकोपलाई छिटो भन्दा छिटो नियन्त्रणमा लिने दावी गरे ।