काठमाडौं, २५ असार ।  ललितपुरको ग्वार्कोस्थित किस्ट अस्पतालमा भर्ना भएकी एक गर्भवतीसहित चार जना बिरामीमा कोरोना भाइरसको संक्रमण देखिएको छ। पाटन अस्पतालमा गरिएको परीक्षणमा उनीहरूमा संक्रमण पुष्टि भएको अस्पतालका चिफ अपरेटिङ अफिसर अमिस पाठकले जानकारी दिनुभयो ।

संक्रमितहरूमध्ये धापाखेल निवासी २९ वर्षीय गर्भवती महिला छन्। अर्का ग्वार्को घर भएका ११ वर्षीय बालक छन्। उनी ज्वरो आएर आइसोलेसनमा भर्ना भएको अस्पतालले जनाएको छ । यस्तै, ६५ वर्षीय पथ्थरीका समस्या भएका पुरूषमा पनि संक्रमण पुष्टि भएको छ। उनी सानागाउँ निवासी रहेको अस्पतालले हुन ।

अर्का संक्रमित भने ललितपुर ठेगाना भएकी ६६ वर्षीया महिला हुन्। उनलाई दमको समेत समस्या छ। अस्पतालले उनलाई सुरूमा आइसियूमा भर्ना गरेको र पछि स्वास्थ्यमा सुधार आए पनि आइसोलेसनमा सारिएको छ । अहिले चार जना संक्रमितलाई पाटन अस्पताल ‘रिफर’ गर्ने तयारी गरिएको अस्पतालले जनाएको छ।