काठमाडौं ८ असोज । नुवाकोटको शिवपुरी गाउँपालिकास्थित सुनखानी घर भइ कपन बस्दै आएका शंकर प्रसाद पन्तको गाडीको ठक्करबाट मृत्यु भएको छ ।

छोराको बर्थडे मनाउने सुर कसेर पसलबाट निस्केका शंकर घर पुग्नै पाएनन् । बीच बाटोमै उनलाई गाडीले ठक्कर दियो । हिँड्दै बसपार्क पुगेका शंकरलाई विनायक अस्पताल अगाडि मन्दीर छेउमा मयुर यातायातको गाडीले ठक्कर दिएको हो ।

पछिल्लो समय सरकारले पसल व्यवसाय सञ्चालनमा सहज बनाएपछि शंकरले पसल खोलेका थिए । उनको बालाजु चौकी अगाडि पसल छ । लामो समय बन्द रहेको पसल खोल्न थालेपछि दिनदिनै मोटरसाइलकमा ‘बालाजु देखि कपन’ आवतजावत गर्थे उनी ।

गत मंगलबार शंकरको छोरा आशिषको १७ औं ‘बर्थडे’ । छोराको बर्थडे बेलुका मनाउने हो भन्दै शंकरले ६ गते पनि पसल खोले । मोटरसाइकल बिग्रेको कारण पसलसम्म शंकरलाई श्रीमती रोजीले स्कुटीमा छाडिदिइन् ।

मोटरसाइकल नभएका कारण श्रीमतीलाई लिन बोलाएका थिए भने छिटो होस् भनेर नै हिँड्दै सडक नापिरहेका थिए । श्रीमती पनि शंकरलाई लिन स्कुटीमा आइरहेकी थिइन् ।

जब श्रीमतीले श्रीमान छटपटाइरहेको भेटिन्

जतिबेला दुर्घटना भयो । त्यतिनै बेला श्रीमती पनि विनायक अगाडि नै पुगेकी थिइन् । तर, त्यहाँ पुग्दा उनका लागि बज्रपात हुन पुग्यो । घटनास्थलमा मान्छेहरु झुम्मिरहेको बेला श्रीमती रोजी पनि के भएको रहेछ भनेर स्कुटर रोकी हेर्न पुग्दा आफ्नै श्रीमान भएको खुलेको थियो ।

रोजीसँगै अन्य मानिसले शंकरलाई लगत्तै नजिकैको विनायक अस्पताल पुर्याइयो भने त्यहाँ उपचार सम्भव नभएपछि महाराजगञ्जस्थित टिचिङ अस्पताल रिफर गरियो ।

टिचिङ अस्पतालमा उपचारको क्रममा शंकरको मृत्यु भएको महानगरीय प्रहरी वृत्त महाराजगञ्जका प्रमुख डीएसपी रोशन खड्काले जानकारी दिए । मंगलबार साँझ अन्दाजी ८ बजेको समयमा सडकमा हिँडिरहेका शंकरलाई गाडीले ठक्कर दिएको खड्काको भनाइ छ । यस्तै मृतक पन्तको शव अहिले टिचिङ अस्पतालमै छ ।  छोराको बर्थडे मनाउने भन्दै शंकरले अघिल्लो दिन सोमबार नै घर नजिकैको बेकरीमा ‘केक’ अर्डर दिएका थिए । तर, शंकरले अर्डर गरेको केक छोराले काट्न पाएनन् । उल्टो आफ्नो बर्थडेको दिन बाबुको मृत्यु भएको खबर सुन्नुपर्यो । छोरा आशिषले आफ्नो जन्मदिनको खुसीयाली मनाउन हतार गरेर हिँड्नु भएको बुबा गुमाउन पर्दा पीडा भएको भावुक हुँदै बताए ।