काठमाडौँ, १४ पुस । नेपाल कम्युनिष्ट पार्टी (नेकपा) प्रचण्ड- नेपाल पक्षकी नेतृ अष्टलक्ष्मी शाक्यले प्रधानमन्त्री केपी शर्मा ओली सर्वसत्तावादी शासक बनेको बताउनुभयो । पार्टीले आयोजना गरेको संसद् विघटनको विरोधमा आयोजित सभामा बोल्दै शाक्यले प्रधानमन्त्री ओलीले जनताले गरेको आन्दोलन र संविधानको अपेक्षा पूरा गर्न नसकेको बताउनुभयो । काठमाडौंमा मंगलबार आयोजित कार्यक्रममा नेतृ शाक्यले भन्नुभयो,जनताको शक्तिको अगाडि राजसंस्था त टिकेन भने केपी ओली कहाँ टिक्छ ? केपी ओली आज कामरेड बन्नुभएन, सामन्ती शासक बन्नुभयो, सर्वसत्तावादी शासक बन्नुभयो । जनताको अधिकार खोस्ने शासक बन्नुभयो ।
‌केपी ओली प्रधानमन्त्री भइसकेपछि मुलुक अगाडि बढ्छ । गणतन्त्र, समाजवाद अगाडि बढ्छ लागेको थियो । जनताले दुःख पाउने छैनन् लागेको थियो । जनताले सडकमा जानुपर्ने छैन लागेको थियो । तर फेरि एकचोटी संघीय गणतन्त्रमाथि, संविधानमाथि प्रहार गरेको छ । संविधानमाथि कू भएको छ, शाक्यले भन्नुभयो । नेकपाले तीनवटै तहमा जनताबाट सरकार सञ्चालन गर्ने अधिकार प्राप्त गर्दा पनि प्रधानमन्त्री ओलीका कारण त्यसो हुन नसकेको शाक्यको भनाइ थियो । पुष्पकमल दाहाल प्रचण्ड र माधवकुमार नेपाल पक्षले मंगलबार देशभर संसद विघटनको विरोधमा प्रदर्शन गरिरहेको छ । काठमाडौंको कार्यक्रममा अध्यक्षद्वय दाहाल र नेपाललगायतका नेताहरू सहभागी रहेका छन् । प्रधानमन्त्री ओलीको सिफारिसमा पुस ५ गते राष्ट्रपति विद्यादेवी भण्डारीले प्रतिनिधिसभा विघटन गर्नुभएको थियो ।