काठमाडौं, २० पुस । लुम्बिनी प्रदेशका मुख्यमन्त्री शंकर पोखरेलले माधवकुमार नेपालको ढाडमा टेकेर केपी ओलीको टाउकोमा हान्न खोज्दा प्रचण्ड आफैं सडकमा पुगेको टिप्पणी गर्नुभएको छ । ढाडमा टेकेर टाउकोमा हान्ने नीति सधैं सफल हुँदैन, उहाँले भन्नुभयो ुयसपटक कमरेड प्रचण्ड फस्नुभयो। चितवनमा जिल्ला कार्यकर्ता भेलालाई सम्बोधन गर्दै पोखरेलले पूर्व एमाले भित्रको अन्तर्विरोधमा खेल्न खोज्दा प्रचण्ड फसेको बताउनुभयो । सडकमा निस्कँदा जनताले साथ देलान् भन्ने सोचेका प्रचण्डलाई आफ्नै कार्यकर्ताले साथ नदिएको बताउनुभयो । उहाले जनताले साथ नदिएपछि विदेशीसँग हारगुहार गर्न थालेको समेत बताउनुभयो ।
उहाले प्रधानमन्त्रीले कानुनलाई टेकेरै संसद विघटन गरेको दाबी गर्नुभयो । जनतामा जान नचाहनेहरूले विघटनको विरोध गरेको भन्दै उनले चुनावमा जितेर प्रधानमन्त्री बन्न प्रचण्डलाई चुनौती समेत दिनुभयो । प्रचण्ड चुनावसँग डराएर हरेकचोटि निर्वाचन क्षेत्र परिवर्तन गर्ने गरेको आरोप लगाउँदै उहाले अबको निर्वाचनमा चितवन पनि छाड्ने दाबी गर्नुभयो । उहाले सरकारले तोकिएकै मितिमा निर्वाचन गर्ने पनि बताउनुभयो । यद्यपि हामी अदालतको निर्णयको सम्मान गर्छौं, उहाँले भन्नुभयो । उहाले निर्वाचन आयोगमा केपी ओली नेतृत्वको पार्टी नै आधिकारिक रहेको समेत दावी गर्नुभयो ।