काठमाडौं । भारतको बिहारमा गंगा नदीको जलस्तर थप बढ्न सक्ने सम्भावनालाई ध्यानमा राख्दै पटनासहित आठ जिल्लामा सतर्कता जारी गरिएको छ ।

बिहारको विपद् व्यवस्थापन विभागका अनुसार बिहीबार राति पटनास्थित गान्धी घाट र शुक्रबार दिउँसो हाथिदाह (मोकामा) मा गंगाको जलस्तरले उच्चतम बाढीको तह पार गर्न सक्ने सम्भावना छ ।

सम्भावित जोखिमलाई मध्यनजर गर्दै विभागले भोजपुर, पटना, सारण, वैशाली, नालन्दा, बेगुसराय, लखीसराय र जहानाबादका नदी किनार तथा तल्लो क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ ।

नदी र तल्लो क्षेत्रबाट टाढा रहन आग्रह

विभागले सर्वसाधारणलाई नदी, घाट, तटबन्ध तथा तल्लो भूभागबाट टाढा रहन अपिल गरेको छ । बाढीको अवस्था सिर्जना भएमा स्थानीय प्रशासनले जारी गर्ने निर्देशन अनिवार्य रूपमा पालना गर्नसमेत आग्रह गरिएको छ ।

सम्भावित बाढीबाट जोखिममा पर्न सक्ने क्षेत्रमा प्रशासन तथा उद्धार संयन्त्रलाई तयारी अवस्थामा राखिएको विभागले जनाएको छ ।

विपद्को अवस्था आएमा तत्काल जानकारी गराउन बिहार राज्य आपत्कालीन सञ्चालन केन्द्रको हेल्पलाइन नम्बर १०७० मा सम्पर्क गर्न विभागले आग्रह गरेको छ ।

Originally published on abcnews.com.np.