कावासोती २० पुस । नेपाल कम्युनिष्ट पार्टी नेकपाको प्रचण्ड–नेपाल पक्षका स्थायी समिति सदस्य घनश्याम भुसालले बैशाखमा कुनै हालतमा निर्वाचन हुन नसक्ने बताउनुभएको छ । मध्यावधि निर्वाचन गर्नका लागि नभई देखाउन मात्र घोषणा गरिएको भुसालले बताउनुभयो ।

उहाँले निर्वाचनमा जाने प्रक्रिया र बाटो नै गलत रोजिएकाले बैशाखमा निर्वाचन हुने कुरा पत्याउनै नसकिने बताउनुभयो । सोमबार पुर्वी नवलपरासीको देवचुलीमा जिल्लास्तरीय कार्यकर्ता भेलालाई सम्बोधन गर्दै निवर्तमान कृषि तथा पशुपंंक्षी विकासमन्त्री समेत रहेका भुसालले भने, ‘निर्वाचन गर्नका लागि निर्वाचन घोषणा गरिएको होइन, बैशाखमा निर्वाचन हुन्छ भनेर कसैले पत्याउँछ र ?’ भुसालले बैशाखअघि नै प्रतिनिधिसभा पुनर्स्थापना हुनेसमेत दाबी गर्नुभयो ।

भुसालले पूर्वराजा ज्ञानेन्द्रले विघटन गरेको संसदसमेत पुनर्स्थापित भएको स्मरण गर्दै अहिले पुर्नस्थापना नहुने प्रश्नै नआउने उल्लेख समेत गर्नुभयो । उहाले पार्टीका सबै कमिटी र संसदीय दलमा अल्पमतमा परेका ओलीले असंवेधानिक रुपमा संसद विघटन गरेको आरोप समेत लगाउनुभयो । भुसालले प्रधानमन्त्रीप्रति संकेत गर्दै जसले संसद विघटन गर्यो उसैले निर्वाचन गर्छु भन्नु कुनै हालमा पत्याउनै नसकिने बताउदै तत्काल संसद पुनर्स्थापना नभए मुलुकमा अस्थिरता पैदा हुन सक्ने समेत उहाले आशंका ब्यक्त गर्नुभयो ।