काठमाडौं, ३ पुस । अमेरिकी गुप्तचर निकाय सिआइएले दिएको सूचनाका आधारमा रुसको सुरक्षा निकायले सेन्ट पिटर्सबर्गमा हुन लागेको आक्रमण रोक्न सफल भएको अमेरिकी तथा रुसी नेताले बताएका छन् ।

रुसी राष्ट्रपति भ्लादिमिर पुटिनले अमेरिकी राष्ट्रपति डोनाल्ड ट्रम्पलाई टेलिफोन गरेर सूचना दिएकोमा धन्यवाद दिएको ह्वाइट साउस र क्रेमलिनले पुष्टि गरेको छ । सेन्ट पिटर्सबर्गको प्रमुख गिरजाघरमा बिद्रोहीले आक्रमणको योजना बनाएको र यो सूचना सिआइएले रुसी अधिकारीलाई दिएको थियो । त्यसपछि रुसी सुरक्षाकर्मी आक्रमणको योजना असफल पार्न सफल भएको उल्लेख गरिएको छ । यो अक्रमण शनिबार गर्ने तयारी भएको थियो । रुसी समाचार संस्था इन्टरफेक्सका अनुसार पुटिनले ट्रम्पसंगको टेलिफोनवार्ताको क्रममा अमेरिकासंग सम्बन्धित यस्तै जानकारी आफूहरुले पाएमा पनि सूचना गर्ने बताउनुभएको छ । इस्लामिक बिद्रोही संगठन इस्लामिक स्टेट (आइएस) समर्थित समूहका सातजनालाई हतियार, विस्फोटक पदार्थ र पमप्लेटसहित पक्राउ गरिएको रुसी सुरक्षा सेवा एफएसबीले जनाएको छ । यहि समूहले आक्रमणको योजना बनाएको एफएसबीको दाबी छ ।