काठमाडौं, १३ फागुन । नेपाली काँग्रेसले सत्ता समीकरणबारे छलफल गर्ने समय आइनसकेको निस्कर्ष निकालेको छ । सभापति शेरबहादुर देउवा निवास बुढानीलकण्ठमा बिहीबार बसेको पदाधिकारी बैठकले सत्ता समीकरणको विषयमा प्रवेश गर्ने समय नै नआएको निस्कर्ष निकालेको हो ।

अदालतले प्रतिनिधिसभा पुर्नस्थापना गरेको भोलिपल्टै बुधबार नेकपाको प्रचण्ड–नेपाल समूहका अध्यक्षद्वय पुष्पकमल दाहाल प्रचण्ड र माधवकुमार नेपाल देउवा निवासमै पुगेर सत्तासमीकरणको प्रस्ताव राख्नुभएको थियो । देउवाले त्यसबारे बिहीबार पदाधकिारी बैठकमा छलफल गर्ने जवाफ दिनु भएको थियो । बैठकको सुरुआतमै सभापति देउवाले नेकपाका दुवै समूहले सरकारमा सहकार्यको प्रस्ताव राखेको जानकारी गराउनुभएको थियो । तर, देउवाले आफूले कुनै पनि समूहलाई सहकार्यको बचन नदिएको बताउनुभयो । नेकपा विभाजित नभएसम्म कुनै पनि समूहसँग सहकार्यबारे निर्णय नहुने उहाँको भनाइ थियो । देउवानिकट सह–महामन्त्री डा. प्रकाशशरण महतले नेकपा विभाजनको अवस्था हेरेर मात्र काँग्रेसले सत्ता साझेदारीबारे सोच्ने जानकारी दिनुभयो ।