काठमाडौं, ९ पुस । फिलिपिन्समा आएको शक्तिशाली आँधीका कारण मृत्यु हुनेको संख्या एक सय ८० पुगेको छ ।

दक्षिणी फिलिपिन्समा आएको उष्णप्रदेशीय आँधीका कारण मानवीय तथा भौतिक क्षति भएको छ । अझै पनि १२ जनाभन्दा बढि मानिस हराइरहेको सरकारी अधिकारीले बताएका छन् । आँधी बेहरीका कारण सबैभन्दा बढी फिलिपिन्सको दक्षिणी क्षेत्रमा रहेको मिन्दानाओ टापु प्रभावित भएको छ । टेम्बिन नामको उष्णप्रदेशीय आँधी ८० मिलीमिटर प्रति घण्टाको गतिमा मिन्दानाओबाट दक्षिणमा पर्ने पलावानतर्फ अघि बढेको छ । बाढीले मिन्दानाओ टापुका केही गाउँ नै बगाएको छ । हराइरहेकाको खोजी भैरहेको फिलिपिन्सका अधिकारीले बताएका छन् । सरकारले आँधीका कारण प्रभावित क्षेत्रमा आपकालीन अवस्था घोषणा गरेको छ ।

यसैबिच, फिलिपिन्सको दक्षिणी क्षेत्रमा रहेको एक सपिङ मलमा आगलागी हुँदा २५ जनाभन्दा बढीको मृत्यु भएको छ । राजधानी मनिलाबाट ८ सय किलोमिटर दक्षिण पूर्वमा रहेको दाभाओको सपिङ मलमा आगलागी भएको हो । सपिङ मलको चौथो तलामा रहेको कल सेन्टरमा रहेका धेरै कर्मचारीको मृत्यु भएको हुनसक्ने स्थानीय अधिकारीहरुलाई उदृत गर्दै अन्तर्रा्ष्ट्रिय सञ्चारमाध्यमहरुले जनाएका छन् । कलसेन्टरमा फसेका कर्मचारीको जीवित रहने सम्भावना शून्य रहेको सरकारी अधिकारीले बताएका छन् । आगलागीको कारणबारे अनुसन्धान भईरहेको बताईएको छ ।