काठमाडौं , ११ पुस । रुसका विपक्षी नेता एलेक्से नभाल्नीले अर्को वर्ष हुने राष्ट्रपतीय चुनावमा आफूलाई भ्लादिमिर पुटिनविरुद्ध उठ्न वञ्चित गरिएपछि चुनाव बहिष्कार गर्न आह्वान गरेका छन् ।

उनले आफू विनाको चुनावको वैधानिकता नहुने भन्दै मतदाताहरुलाई विरोध जनाउन आह्वान गरेका हुन् । रुसको निर्वाचन आयोगले नभाल्नीविरुद्धको फौजदारी अभियोगमा दोषी ठहराइएकोले उनलाई राष्ट्रपतिको उम्मेदवार हुन अयोग्य ठहर गरेको हो । पुटिन चौथो कार्यकालका लागि चुनावमा उठ्न लागेका हुन् । ४१ वर्षीय नभाल्निलाई राष्ट्रपति भ्लादिमिर पुटिनलाई चुनौती दिनसक्ने एकमात्रै उम्मेदवारका रुपमा हेरिएको थियो । भ्रष्टाचारसम्बन्धी अभियोगमा दोषी ठहरिएको भन्दै केन्द्रिय निर्वाचन आयोगले नभाल्नी चुनाव लड्नका लागि अयोग्य भएको बताएको छ । नभाल्नीले भने आफूविरुद्धको अभियोग राजनीतिक रुपमा अभिप्रेरित भएको बताएका छन् । निर्वाचन आयोगको निर्णयपछि बोल्दै नभाल्नीले आफूहरुलाई भाग लिन भनिएको प्रक्रिया चुनाव नभएको भन्दै विरोध प्रदर्शनको घोषणा मतदाताहरुले गर्ने बताए । पुटिनका समर्थकहरु राष्ट्रपतीय उम्मेदवारको मनोनयन प्रक्रिया थाल्न आज भेट्दै छन् । किरोभ राज्यका गभर्नरको सल्लाहकार हुँदा सरकारी काठ कम्पनीबाट झण्डै पाँच लाख डलर बराबरको काठ घोटाला गरेकोमा उनलाई दोषी ठहराइएको थियो ।