काठमाडौँ, १८ फागुन । अमेरिकाले रुसी विमानहरुलाई अमेरिकी आकाशमा प्रतिबन्ध लगाएको घोषणा गरेको छ ।
अमेरिकी कंग्रेसलाई नेपाली समय अनुसार आज बिहान सम्बोधन गर्दै राष्ट्रपति जो बाइडेनले रुसका लागि अमेरिकी आकाश बन्द गरिएको बताउनुभएको हो ।

स्टेट अफ युनियन एड्रेस भनिने वार्षिक सम्बोधनका क्रममा बाइडेनले रुसले विना कारण युक्रेनमाथि हमला गरेको भन्दै त्यसको मूल्य रुसी राष्ट्रपति भ्लादिमिर पुटिनले चुकाउनुपर्ने चेतावनी पनि दिनुभयो । युक्रेनको सहयोगका लागि नाटोले सेना नपठाउने दोहोर्‍याउँदै उहाँले पुटिनले अमेरिकासहित पश्चिमा शक्तिहरुले कसरी जवाफ दिन्छन भन्ने कुराको नजर अन्दाज गरेको पनि बताउनुभयो । बाइडेनले रुस विश्वबाट अलग्गिएको भन्दै रुसी अर्थतन्त्र पूर्ण रुपमा बर्वाद हुने ठोकुवा पनि गर्नुभयो । नाटो गठबन्धनमा आवद्ध कुनै पनि भूमिमा कसैलाई कब्जा गर्न नदिने प्रतिवद्धता ब्यक्त गर्दै उहाँले जुनसुकै मूल्य चुकाएर भए पनि एक ईञ्च भूमि गुम्न दिइने छैन भन्नुभयो । रुसी शासक र तिनीहरुका सहयोगीका निजी सम्पति पनि जफत गरिने उद्घोष पनि राष्ट्रपति बाइडेनले गर्नुभएको छ । देशको आर्थिक अवस्थाको बारेमा बोल्दै उहाँले कारोनाका कारण अर्थतन्त्रमा समस्या आए पनि त्यसको क्षतिपूर्तिका लागि कसैको बेतनमा कटौती नगरिने स्पष्ट पार्नुभयो । बरु सरकारले आफ्नो खर्च कम गर्ने उहाँको भनाइ थियो ।