काठमाडौँ, ४ चैत । नेपालले आईसीसी विश्वकप क्रिकेट लिग-२ अन्तर्गत आफ्नो दोस्रो खेलमा घरेलु टोली संयुक्त अरव इमिरेट्स (यूएई) विरुद्ध फिल्डिङ गर्ने भएको छ । शुक्रबार यूएईले दुबई अन्तर्राष्ट्रिय रंगशालामा टस जितेर नेपाललाई फिल्डिङको निम्तो दिएको हो । नेपाल र युएई दुवैले यसअघि आफ्नो पहिलो खेलमा पपुवा न्युगिनी (पीएनजी) लाई हराएका थिए । सन् २०२३ को विश्वकप छनोटको आधार रहेको लिग २ को अंकतालिकामा यूएई दोस्रो र नेपाल छैटौं स्थानमा छ । लिग-२ मा ७ राष्ट्रको सहभागिता रहेको छ ।

नेपालले दुबई अन्तर्राष्ट्रिय क्रिकेट मैदानमा पहिलो पटक खेलिरहेको हो । सन् २०१८ मा विश्वकप छनोटबाट एकदिवसीय अन्तर्राष्ट्रिय मान्यता पाएयता नेपालले यूएईसँग चारपटक खेलेको छ र त्यसमा नेपाल र युएईको टोलीले समान २-२ मा जित हात पारेका छन् । नेपाल आजको खेलमा युएईलाई हराएर जित निकाल्ने दाउमा छ । लिगमा यूएई १५ खेलमा ८ जित निकाल्दै १८ अंक जोडेर दोस्रो स्थानमा छ भने नेपाल ९ खेलमा १० अंक जोडेर छैठौंं स्थानमा छ ।