राजविराज, २८ असार । सप्तरीको तिलाठी कोइलाडी गाउँपालिका–१ स्थित तिलाठी गाउँमा बाढीमा फसेका एक गर्भवती महिलालाई उद्धार गरिएको छ ।
स्थानीय ३० वर्षीया ज्योतिदेवी मिश्रालाई उद्धार गरिएको हो । घरमा करिब दुई फिट पानी पसेर समस्यामा रहेकी मिश्रलाई स्थानीयवासीको सहयोगमा उद्धार गरिएको हो । स्थानीय अस्पतालमा सामान्य उपचारपछि थप उपचारका लागि उनलाई धरानस्थित बिपी कोइराला स्वास्थ्य विज्ञान प्रतिष्ठानमा पठाइएको छ ।

यसैबीच आर्थिक अवस्था कमजोर भएकी उक्त गर्भवती महिलालाई स्थानीय व्यवसायी अङ्कितकुमार र शिवशङ्कर पौडेलले जनही रु पाँच हजारका दरले सहयोग गर्नुभएको छ ।

बाढीपीडितलाई राहत
हालै आएको बाढीका कारण सप्तरीका घरबारविहीन तथा बाढीपीडित परिवारलाई राजनीतिक दल, पत्रकार, समाजसेवी र विभिन्न सङ्घसंस्थाले राहत वितरण गरेका छन् ।
नेकपा ९एमाले० राजविराज नगर कमिटिले एक हजार १५५ परिवारलाई त्रिपाल एक थान, झुल एक, डेढ केजी चामललगायतका सामग्री वितरण गरिएको जनाएको छ ।
युवा सङ्घ, अनेरास्वयु तथा टेड्र युनियन महासङ्घ केन्द्रीय समितिले संयुक्तरुपमा सप्तरीका बाढीपीडितका लागि पठाइएको राहत सामग्री वितरण गरेको एमाले सप्तरीले जनाएको छ ।

सो राहत वितरणमा एमालेका स्थायी कमिटी सदस्य एवं प्रदेश नं २ का संयोजक सत्यनारायण मण्डल, सहसंयोजक नागेन्द्र चौधरी, पोलिटब्युरो सदस्य रामपृत पासवान, केन्द्रीय सदस्य सुमनराज प्याकुरेललगायत स्थानीय नेता तथा कार्यकर्ताको उपस्थिति थियो ।

यस्तै रौतहटका युवा पत्रकारको अगुवाइमा संकलन गरिएको राहत सामग्री सप्तरीको सकरपुरा र रायपुरमा वितरण गरिएको छ । बाढीपीडितलाई चुरा, दालमोठ, बिस्कुट, भुजिया, झुल, मिनरल वाटर, चाउचाउ, गम्छा, सेनेटरी प्याडसहितका सामग्री दुवै ठाउँका १०० परिवारलाई वितरण गरिएका छन् ।
त्यस्तै सकरपुरामा जिल्ला खानेपानी डिभिजन कार्यालय राजविराजले ६५ परिवारलाई एक÷एक थान बाल्टिनसहित सरसफाइ सामग्री वितरण गरेको जिल्ला खानेपानी कार्यालयका प्रमुख लोकेन्द्र यादवले जानकारी दिनुभयो ।

सप्तरीमा एक हप्ता अगाडि वर्षासँगै विभिन्न खोलमा आएको बाढीले एक हजार ५०० बढी घर डुबानमा परेको थियो । रासस