काठमाडौँ, १ माघ । पुँजी बजारमा नँया लगानीको स्रोतको रुपमा अघि आएको म्युचुअल फण्डमा आकर्षण बढ्दै गएको छ ।

विभिन्न बैंक तथा वित्तीय कम्पनीका सहायक कम्पनीले म्युचुअल फण्डको बिक्री गर्ने क्रम बढाउदै लगेपछि यसमा लगानीकर्ताको आकर्षण बढेको हो । यसै सन्दर्भमा मंगलबारदेखि थप दुई वटा महत्वपूर्ण कम्पनीले करिब दुई अर्ब रुपैँया बराबरको म्युचुअल फण्डको बिक्री शुरु गर्ने भएका छन् ।

सिटिजन्स बैंकको सहायक कम्पनी सिबिआइएल क्यापिटलले एक अर्ब रुपैँया बराबरको सामूहिक लगानी कोषको इकार्ई बिक्री गर्ने भएको हो । क्यापिटलले रु १० प्रतिइकाईका दरले १० करोड इकाई बिक्री गर्न लागेको हो । जसमध्ये १५ प्रतिशत अर्थात् एक करोड ५० लाख इकाई कोष प्रवद्र्धक सिटिजन्स बैंक इन्टरनेशनल लिमिटेड र बाँकी आठ करोड ५० लाख इकाई सर्वसाधारणका लागि निष्कासन खुल्ला गरेको हो ।

कम्पनीका अनुसार प्रतिइकाई रु १० का दरले न्यूनतम १०० इकाई अर्थात् रु १०० र अधिकतम २० लाख इकाई अर्थात् रु दुई करोड बराबरको आवेदन दिन सकिनेछ । क्यापिटलले ल्याएको सातवर्षे बन्दमुखी सामूहिक यो लगानीकोषमा आगामी माघ २ गतेदेखि ढिलोमा माघ १७ सम्म आवेदन दिन सकिने जनाइएको छ ।

त्यसैगरी एनआइसी एशिया क्यापिटलले व्यवस्थापन गरेको एनआइसी एशिया ग्रोथ फण्डको बिक्री पनि मंगलबारदेखि शुरु हुने भएको छ । सो क्यापिटलको म्युचुअल फण्डको आकार पनि एक अर्ब रुपैँया बराबरको छ । जसमध्ये १५ प्रतिशत कोष प्रवद्र्धक एनआइसी एशिया बैंकलाई सुरक्षित गरिएको छ ।

बाँकी रहेको आठ करोड ५० लाख इकाई विभिन्न संघसंस्था तथा व्यक्तिका लागि बिक्री गरिनेछ । यो योजना छिटोमा माघ ८ गते तथा ढिलोमा माघ २१ गते सम्म बिक्री गरिनेछ । यो म्युचुअल फण्डमा सहभागी हुन चाहने संघसंस्था तथा व्यक्तिले न्यूनतम १०० इकाईदेखि अधिकतम २० लाख इकाईसम्म खरिद गर्न सक्नेछन् । उक्त म्युचुअल फण्डले औसत वार्षिक न्यूनतम १६ प्रतिशतसम्म नगद लाभांश दिने विश्वास दिलाएको छ ।

उक्त म्युचुअल फण्डको वार्षिक प्रतिफल पहिलो वर्ष १५।५७ तथा साताँै वर्षमा १६।१३ प्रतिशत दिने लक्ष्य लिएको कम्पनीले जनाएको छ ।

नेपाल स्टक एक्सचेन्जमा हाल कूल ११ कम्पनीका त्यस्ता म्युचुअल फण्डको कारोबार भइरहेको छ ।