काठमाडौँ, २६ जेठ । राष्ट्रियसभा सदस्यहरूले देशका विभिन्न समस्याहरूलाई संसदसामू पुर्याएका छन् । बिहीबारको बैठकमा इन्दु कडरियाले तराईमा तरकारी खेतीका लागि प्रतिबन्धित गरिएको विषादी प्रयोग गरिएको भन्दै सरकारको ध्यानाकर्षण गराउनुभएको छ ।

राष्ट्रियसभाको बिहीबारको बैठकमा शून्य समयमा बोल्दै राष्ट्रियसभा सदस्य इन्दु कडरियाले तराईमा तरकारी बालिमा सरकारले प्रतिबन्ध गरेको विषादीको प्रयोग बढेको बताउनुभयो । राष्ट्रियसभा सदस्य खिमलाल देवकोटाले स्थानीय तहका नवनिर्वाचित जनप्रतिनिधिहरुलाई विभिन्न तालिमको नाममा अल्झाउने काम नगर्न सरोकारवालाहरूलाई आग्रह गर्नुभयो । उहाँले गोष्ठी र उद्घाटनको नाममा कार्यालय छाडेर हिड्ने परम्परा राज्यका हरेक निकायमा रहेको उल्लेख गर्दै अनावश्यक गोष्ठि र उद्घाटनमा नरमाउन पनि आग्रह गर्नुभयो ।

राष्ट्रियसभा सदस्य दिलकुमारी रावल थापाले विद्यार्थीहरुले हालसम्म पाठ्यपुस्तक नपाएको भन्दै कसको कारणले पाठ्यपुस्तकमा ढिलाई गरिएको हो सरकारले जवाफ दिनुपर्ने बताउनुभयो । उहाँले मनसुनको पूर्वतयारी र विपत प्रतिकार्य योजनाका लागि सरकारले के गरिरहेको छ सो विषयमा गृहमन्त्रीले राष्ट्रिय सभामा आएर जवाफ दिन माग गर्नुभयो । राष्ट्रियसभा सदस्य नन्दा चपाईले गाउँमा उत्पादित तरकारी र फलफुल ढुवानी गर्न समस्या भएको उल्लेख गर्दै शहरमा ढुवानी गरेर ल्याउनका लागि सबै स्थानीय तहमा कृषि एम्बुलेन्सको व्यवस्था गर्न सरकारसँग माग गर्नुभयो ।

राष्ट्रियसभा सदस्य प्रकाश पन्थले काठमाडौंमा फोहोरको डंगुर थुप्रिएको उल्लेख गर्दै यसले महानगर र सरकारलाई गिज्याइरहेको टिप्पणी गर्नुभयो । उहाँले काठमाडौँबासीलाई सभ्य हुन र ल्याण्डफिल साइटका जनतालाई संयमित हुन अनुरोध गर्नुभयो । फोहोर व्यवस्थापनका लागि तिनै तहको सरकार जिम्मेवार हुनुपर्ने उहाँले बताउनुभयो । राष्ट्रियसभा सदस्य भैरवसुन्दर श्रेष्ठले गत वर्ष असोजमा प्राकृतिक प्रकोपबाट क्षति भएको धानको क्षतिपुर्ति सरकारले दिने भने पनि हालसम्म नदिएकाले किन ढिलो भएको भनि सरकारको ध्यानाकर्षण गराउनुभयो । राष्ट्रियसभा सदस्य रामचन्द्र राईले त्रिभुवन राजपथ अलपत्र परेको भन्दै सो सडकलाई मर्मत गरेर सञ्चालन गर्नुपर्ने बताउनुभयो । त्यसैगरी काठमाडौं आवतजावतका लागि मदन भण्डारी मार्ग र कुलेखानी मार्गलाई पनि मर्मत सम्भार गर्नुपर्ने उहाँले बताउनुभयो ।

राष्ट्रियसभा सदस्य डा. विमला राई पौड्यालले सरकारले विपद्को पूर्वतयारी के गरिरहेको छ भन्ने प्रश्न गर्नुभयो । उहाँले आगामी दुई हप्ता विपद्को तयारी गर्नको लागि स्थानीय तहहरुसँग समन्वय गरेर अभियान सुरु गर्न सरकार सँग माग गर्नुभयो । राष्ट्रियसभा सदस्य सिंहबहादुर विश्वकर्माले राहदानी विभागलाई ईपासपोर्ट जारी गर्ने सेवालाई विस्तार गर्नुपर्ने बताउनुभयो । सेवा विस्तार नहुँदा सेवाग्राहीले झन्झट बेहोर्नु परेको उहाँले उल्लेख गर्नुभयो । उहाँले विभागको काम सुस्त हुने गरेको र विचौलियाहरुले घुस लिने दिने विकृति निम्त्याएको पनि बताउनुभयो । उहाँले यसतर्फ सरकारको ध्यानाकर्षण गराउनुभयो ।