काठमाडौं । नेपाल भलिबल लिग (एनभीएल) ले उद्घाटन दिनको टिकट बिक्रीबाट प्राप्त हुने सम्पूर्ण रकम प्रधानमन्त्री दैवी प्रकोप उद्धार कोषमा जम्मा गर्ने भएको छ ।

एनभीएलले सोमबार प्रेस विज्ञप्ति जारी गर्दै भोटेकोसी बाढीबाट प्रभावित नागरिकको सहयोगार्थ पहिलो दिनको टिकट बिक्रीबाट प्राप्त रकम उद्धार कोषमा उपलब्ध गराउने जनाएको हो ।

एनभीएलको दोस्रो संस्करण शुक्रबारदेखि काठमाडौंमा सुरु हुँदैछ । उद्घाटन दिन मधेश वारियर्स र सगरमाथा स्मार्सबीच पहिलो खेल हुनेछ । त्यसपछि अन्नपूर्ण स्पाइकर किंग्स र कर्णाली शिवराजबीच प्रतिस्पर्धा हुनेछ ।

एनभीएलका अनुसार लिगका सबै खेलको टिकट आईएमई खल्ती लिमिटेड बाट खरिद गर्न सकिनेछ । टिकट बुकिङसमेत खुला भइसकेको लिगले जनाएको छ ।

लिगका खेल काठमाडौंको त्रिपुरेश्वरस्थित राष्ट्रिय खेलकुद परिषद्को कभर्डहलमा सञ्चालन हुनेछन् ।

भोटेकोसी बाढीबाट प्रभावित नागरिकको उद्धार तथा राहतमा सहयोग पुर्‍याउने उद्देश्यले एनभीएलले उद्घाटन दिनको टिकट बिक्रीको सम्पूर्ण रकम सहयोग गर्ने निर्णय गरेको जनाएको छ ।

Originally published on abcnews.com.np.