काठमाडौं, १६ भदौ । इंग्लिस प्रिमियर लिग फुटबलमा म्यानचेस्टर सिटीले ६–० गोलको फराकिलो जित निकालेको छ । गएराति भएको खेलमा म्यानचेस्टर सिटीले नटिङ्घम फरेस्टलाई ६–० गोलले हराएको हो । सिटीका एर्लिङ ब्राउट हालाण्डले ह्याट्रिक गरे । उनले लगातार दोस्रो खेलमा ह्याट्रिक समेत गरेका छन् ।

यसअघि हालान्डले क्रिस्टल प्यालेससँगको खेलमा ह्याट्रिक गरेका थिए । जुलियन अल्भारेजले दुई तथा जोआओ क्यान्सेलोको एक गोल थपे । जितसँगै सिटी ५ खेलबाट १३ अंक जोडेर दोस्रो स्थानमा यथावत् छ । पराजित नटिङ्घम फरेस्ट ४ अंक जोडेर १५औं स्थानमा छ ।

यस्तै, गए राति नै भएको इंग्लिस प्रिमियर लिग फुटबलमा आर्सनलले एस्टनभिल्लालाई २–१ गोलले हराएको हो । लगातार ५ खेल जितेको आर्सनल शीर्षस्थानमा कायमै छ । आर्सनलको १५ अंक छ । यस्तै अर्को खेलमा लिभरपुलले न्यक्यासललाई २–१ गोलले हराएको छ । उसको ५ खेलमा ८ अंक छ । लिभरपुल अंकतालिकाको पाँचौ स्थानमा छ । अर्को खेलमा बर्नमाउथ र उल्भ्स्ले गोलरहित बराबरी खेलेका छन् । वेष्ट ह्याम र टोटनहमले एकरएक गोलको बराबरी खेलेका छन् ।