धनगढी २० पुस । सुदूरपश्चिम प्रदेशमा एक साताभित्र मुख्यमन्त्रीको दाबी पेश गर्न प्रदेश प्रमुख देवराज जोशीले आह्वान गरेका छन्।

नेपालको संविधानको धारा १६८ को उपधारा २ बमोजिम मुख्यमन्त्रीका लागि दाबी पेश गर्न प्रदेश प्रमुखले आह्वान गरेको प्रदेश प्रमुखको कार्यालयका प्रवक्ता दीर्घराज भट्टले जनाएका छन्।

प्रदेश प्रमुखको कार्यालयले बुधबार जारी गरेको विज्ञप्तीमा ‘नेपालको संविधानको धारा १६८ को उपधारा २ बमोजिम सुदूरपश्चिम प्रदेशको प्रदेश सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेश सभाको सदस्यलाई सुदूरपश्चिम प्रदेशको मुख्यमन्त्री नियुक्त गर्नका लागि मिति २०७९र०९र२७ गते बुधबार बेलुका ५ बजेभित्र दावी पेश गर्न’ भनिएको छ।

संविधानको धारा १६८ को उपधारा १ मा प्रदेश सभामा बहुमत प्राप्त गर्ने दलको नेतालाई मुख्यमन्त्री नियुक्त गर्ने व्यवस्था छ। तर, सुदूरपश्चिम प्रदेश सभामा कुनै पनि दलले बहुमत प्राप्त गर्न नसकेपछि दुई वा दुईभन्दा बढी दलको समर्थनमा दाबी पेश गर्न आह्वान गरिएको हो।