काठमाडौँ, २४ माघ । साफ यू–२० महिला च्याम्पियनसिप फुटबलअन्तर्गत नेपालले आज चिरप्रतिद्वन्द्वी भारतसँग प्रतिस्पर्धा गर्दै छ ।

बंगलादेशको ढाकामा हुने खेल नेपाली समयअनुसार दिउँसो सवा ३ बजे सुरू हुने छ ।

पहिलो खेलमा बंगलादेशसँग हार व्यहोरेको नेपालले भुटानमाथि ४–० गोलको जितका साथ पुनरागमन गरेको थियो । भुटानविरूद्ध अमिशा कार्कीले ह्याट्रिक गरेकी थिइन् ।

दुई खेलबाट ३ अंक जोडेको नेपाल तालिकाको तेस्रो स्थानमा छ । भारत जारी प्रतियोगितामा अपराजित छ । पहिलो खेलमा भारतले भुटानलाई १२–० गोलको फराकिलो अन्तरले पराजित गरेको थियो । दोस्रो खेलमा बंगलादेशसँग बराबरीमा रोकियो । ४ अंकसहित भारत शीर्ष स्थानमा छ ।

समान अंक जोड्दै बंगलादेश दोस्रो स्थानमा छ । बंगलादेशले आजै भुटानसँग खेल्ने छ । राउन्ड रोविन लिगका यी अन्तिम खेलले फाइनल पुग्ने दुई टिमको टुंगो लाग्ने छ ।

नेपाललाई उपाधि नजिक पुग्न भारतलाई जित्नै पर्ने दबाब छ । भारतलाई फाइनल पुग्न बराबरी पर्याप्त हुने छ ।